محکمہ کسٹمزکے افسران کی ترقی اثاثہ جات کی تفصیل سے مشروط

کراچی (کسٹم بلیٹن )محکمہ کسٹمزسے تعلق رکھنے والے گریڈ17تاگریڈ18کے افسران کو اپنے اثاثہ جات کی تفصیلات بورڈمیں جمع کروانے کی ہدایات جاری کی گئی ہے۔تفصیلات کے مطابق پاکستان کسٹمز سروس میں گریڈ 17 افسران کی گریڈ 18 میں ترقی کے طویل عرصے سے زیرِ التوا عمل کو حتمی مرحلے میں داخل کرنے کے لیے محکمانہ ترقیاتی کمیٹی ( DPC) کے انعقاد کی تیاریاں تیزی سے مکمل کی جا رہی ہیں۔ اس ضمن میں مجاز حکام کی جانب سے ایک جامع سرکلر جاری کیا گیا ہے، جس میں ترقی کے زون میں شامل افسران کے لیے واضح اور حتمی ہدایات جاری کی گئی ہیں۔سرکلر کے مطابق ترقی کے اہل تمام گریڈ 17 افسران کو ہدایت کی گئی ہے کہ وہ اپنی پرفارمنس ایویلیوایشن رپورٹس (PERs) اور اثاثہ جات کے گوشوارے جو کہ 30 جون 2025 تک کے ہیں، ہر لحاظ سے مکمل، تصدیق شدہ اور بروقت بورڈ میں جمع کرائیں۔سرکلر میں واضح کیا گیا ہے کہ مطلوبہ ریکارڈ 16 جنوری 2026 تک بورڈ میں پہنچ جانا چاہیے، بصورتِ دیگر متعلقہ افسران کو ڈی پی سی کے اجلاس میں ترقی کے لیے زیرِ غور نہیں لایا جائے گا۔ حکام کے مطابق اس ہدایت کا مقصد ترقی کے عمل کو شفاف، میرٹ پر مبنی اور کسی بھی تاخیر کے بغیر مکمل کرنا ہے۔ذرائع کے مطابق ڈی پی سی کے متوقع انعقاد سے پاکستان کسٹمز سروس میں انتظامی تسلسل، پیشہ ورانہ نظم و ضبط اور ادارہ جاتی استحکام کو تقویت ملے گی۔ ماہرین کے مطابق بروقت ترقیوں سے نہ صرف افسران کا مورال بلند ہوگا بلکہ ریونیو اہداف کے حصول اور تجارتی سہولت کاری کے عمل میں بھی بہتری آئے گی۔