محمد ارشد جمال فیڈریشن کی سینٹرل اسٹینڈنگ کمیٹی برائے کسٹمز انفورسمنٹ کے کنوینر مقرر

کراچی(کسٹم بلیٹن)فیڈریشن آف پاکستان چیمبرز آف کامرس اینڈ انڈسٹرینے کسٹمز انفورسمنٹ کے شعبے میں پالیسی، اصلاحات اور بزنس کمیونٹی کے مسائل کے موثر حل کے لیے سنٹرل اسٹینڈنگ کمیٹی آن کسٹمز انفورسمنٹ تشکیل دیتے ہوئے محمد ارشد جمال کو سال 2026 کے لیے اس کمیٹی کا کنوینر مقرر کر دیا ہے۔اس ضمن میں فیڈریشن کی جانب سے جاری کردہ باقاعدہ تقرر نامے کے مطابق، محمد ارشد جمال کو یہ اختیار دیا گیا ہے کہ وہ ملک بھر سے کم از کم نو (9) پیشہ ور اور تجربہ کار اراکین پر مشتمل کمیٹی تشکیل دیں، جن کا تعلق کسٹمز، ٹریڈ، لاجسٹکس، امپورٹ ایکسپورٹ اور متعلقہ شعبوں سے ہو۔ کمیٹی کی تشکیل فیڈریشن کے طے شدہ اسٹینڈرڈ آپریٹنگ پروسیجرز (ایس اوپیز) کے مطابق 14 دن کے اندر مکمل کرنا ہوگی۔تقرر نامے میں مزید کہا گیا ہے کہ کنوینر اپنی نامزدگی کے 30 دن کے اندر کمیٹی کا پہلا اجلاس طلب کریں گے، جبکہ کمیٹی کو ہدایت کی گئی ہے کہ وہ ہر سہ ماہی کم از کم ایک اجلاس منعقد کرے۔ اجلاسوں میں کسٹمز انفورسمنٹ سے متعلق درپیش مسائل، قانونی و انتظامی رکاوٹوں، اسمگلنگ کی روک تھام، شفافیت، سہولت کاری اور ریونیو کے تحفظ جیسے اہم امور پر غور کیا جائے گا۔کمیٹی کی سفارشات اور آئندہ کے لیے تجویز کردہ اقدامات کی خلاصہ رپورٹ ایف پی سی سی آئی سیکریٹریٹ کو ارسال کی جائے گی، جسے بعد ازاں فیڈریشن کی ایگزیکٹو کمیٹی تک پہنچایا جائے گا۔ کمیٹی کی کارکردگی اور خدمات کوفیڈریشن کی سالانہ کارکردگی رپورٹ میں نمایاں طور پر شامل کیا جائے گا۔فیڈریشن نے واضح کیا ہے کہ کمیٹی کی سرگرمیوں کا سہ ماہی جائزہ لیا جائے گا، اور اگر کمیٹی غیر فعال رہی تو کنوینر شپ واپس لینے کا اختیار محفوظ رکھا گیا ہے۔ اس کے ساتھ ساتھ کمیٹی فیڈریشن سیکریٹریٹ کے ساتھ قریبی رابطہ رکھے گی تاکہ ضروری رہنمائی اور معاونت حاصل کی جا سکے۔تجارتی و صنعتی حلقوں نے محمد ارشد جمال کی تقرری کو خوش آئند قرار دیتے ہوئے امید ظاہر کی ہے کہ کسٹمز انفورسمنٹ کے شعبے میں عملی اصلاحات، بزنس فرینڈلی پالیسیوں اور درآمد و برآمد کے عمل میں بہتری لانے میں یہ کمیٹی موثر کردار ادا کرے گی