ٹیکسٹائل فرم کیخلاف 25 کروڑ سے زائد ٹیکس چوری کا مقدمہ، جعلی مینوفیکچرنگ کا انکشاف

کراچی(کسٹم بلیٹن) کسٹمز پوسٹ کلیئرنس آڈٹ نے میسرز رائل ٹیکسٹائل کے مالک کے خلاف 25 کروڑ 65 لاکھ روپے سے زائد ٹیکس چوری کا مقدمہ درج کرلیا، کمپنی پر جعلی طور پر خود کو مینوفیکچرر ظاہر کرنے کا الزام ہے۔ایف آئی آر کے مطابق کمپنی نے درآمدات پر ٹیکس چھوٹ حاصل کرنے کیلئے غلط بیانی کی اور اضافی سیلز ٹیکس اور ودہولڈنگ ٹیکس میں غیرقانونی رعایت حاصل کی۔تحقیقات کے دوران معلوم ہوا کہ کمپنی نے 2022 سے 2025 کے دوران 125 گڈز ڈیکلریشنز کے ذریعے اربوں روپے مالیت کی درآمدات کیں۔فزیکل ویری فکیشن میں رجسٹرڈ مقام پر کسی قسم کی مشینری موجود نہ تھی جبکہ عملے نے تصدیق کی کہ یہ جگہ صرف گودام کے طور پر استعمال ہو رہی ہے۔کسٹمز حکام کے مطابق کمپنی نے ابتدا ہی سے غلط معلومات فراہم کرکے ٹیکس فوائد حاصل کیے جس سے قومی خزانے کو بھاری نقصان پہنچا۔کلیئرنگ ایجنٹس کے کردار کی بھی تحقیقات جاری ہیں جبکہ مقدمہ مختلف ٹیکس اور کسٹمز قوانین کے تحت درج کیا گیا ہے۔حکام کا کہنا ہے کہ مزید تحقیقات جاری ہیں اور تمام ذمہ داران کے خلاف سخت قانونی کارروائی عمل میں لائی جائے گی