ایران بارڈر کو مسافر بیگیج اسکیم میں شامل کرنے کا فیصلہ

اسلام آباد(کسٹم بلیٹن) فیڈرل بورڈ آف ریونیو نے سرحدی علاقوں میں سہولیات کی فراہمی اور قانونی تجارت کے فروغ کے لیے اہم اقدام اٹھاتے ہوئے ایس آر او 530 جاری کر دیا ہے، جس کے تحت ایران بارڈرسے آنے والے مسافروں کے سامان کو بیگیج اسکیم میں شامل کرنے کا فیصلہ کیاگیاہے، تفصیلات کے مطابق کسٹمز ایکٹ 1969 کی دفعہ 9 کی شق (اے) اور (سی) کے تحت اختیارات استعمال کرتے ہوئے پرانے نوٹیفکیشن ایس آراو102مورخہ 12 فروری 1983 میں مزید ترمیم کی گئی ہے۔جاری کردہ نوٹیفکیشن کے مطابق، مذکورہ شیڈول میں ہیڈنگ سی کے تحت ایک نئی انٹری شامل کی گئی ہے، جس کے تحت ایران بارڈر (ضلع پنج گور) کو باقاعدہ طور پر مسافر بیگیج اسکیم میں شامل کر لیا گیا ہے۔ اس اقدام کے تحت اس سرحدی مقام سے گزرنے والے مسافروں کو اب قانونی طور پر بیگیج لانے اور لے جانے کی سہولت حاصل ہوگی۔حکام کے مطابق یہ فیصلہ بلوچستان کے دور دراز سرحدی علاقوں کے عوام کو ریلیف فراہم کرنے اور ان کی معاشی سرگرمیوں کو سہارا دینے کے لیے کیا گیا ہے۔ جیراک بارڈر کی شمولیت سے نہ صرف مقامی آبادی کو قانونی تجارت کے مواقع میسر آئیں گے بلکہ سرحدی علاقوں میں غیر قانونی اسمگلنگ کی حوصلہ شکنی بھی متوقع ہے۔ذرائع کے مطابق مسافر بیگیج اسکیم کی توسیع حکومت کی اس پالیسی کا حصہ ہے جس کا مقصد سرحدی تجارت کو دستاویزی شکل دینا اور مقامی لوگوں کو سہولیات فراہم کرنا ہے۔ اس اقدام سے ایک طرف قانونی درآمدات میں اضافہ ہوگا تو دوسری جانب کسٹمز ریونیو میں بھی بہتری آنے کی توقع ظاہر کی جا رہی ہے۔مزید برآں، متعلقہ حکام کو ہدایت جاری کی گئی ہے کہ وہ اس ترمیم پر فوری عملدرآمد یقینی بنائیں تاکہ مسافروں کو بلا تعطل سہولت فراہم کی جا سکے اور نئے شامل کیے گئے بارڈر پوائنٹ پر کسٹمز نظام کوموثر بنایا جاسکے۔