ڈیجیٹل انوائسنگ کا نظام نافذ، سیلز ٹیکس میں شفافیت کیلئے ایف بی آر کے سخت اقدامات

اسلام آباد(کسٹم بلیٹن) فیڈرل بورڈ آف ریونیو نے سیلز ٹیکس جنرل آرڈر نمبر01/2026جاری کرتے ہوئے ملک بھر کے تمام سیلز ٹیکس رجسٹرڈ افراد کیلئے الیکٹرانک انوائسنگ اور ایف بی آر کے کمپیوٹرائزڈ سسٹم کے ساتھ مکمل انضمام کو لازمی قرار دے دیا ہے، اس اقدام کے تحت کاروباری اداروں کو اپنی سیلز کی تفصیلات حقیقی وقت میں رپورٹ کرنا ہوں گی جس سے ٹیکس چوری کی روک تھام اور دستاویزی معیشت کے فروغ میں مدد ملے گی، ایف بی آر نے کاروباری طبقے کو درپیش مشکلات کو مدنظر رکھتے ہوئے ایک سے زائد لائسنس یافتہ انٹیگریٹرز کی خدمات حاصل کرنے کی اجازت دے دی ہے تاکہ تکنیکی مسائل اور انحصار میں کمی لائی جا سکے، نئے احکامات کے مطابق جاری کردہ الیکٹرانک سیلز ٹیکس انوائس میں کسی بھی بونافائیڈ غلطی کی صورت میں صرف 72 گھنٹوں کے اندر ترمیم، منسوخی کرنے کی اجازت ہوگی جبکہ اس مدت کے بعد کسی بھی تبدیلی کیلئے متعلقہ کمشنر ان لینڈ ریونیو کی پیشگی منظوری لازمی ہوگی، ایف بی آر نے واضح کیا ہے کہ اس نظام کے ذریعے ہر انوائس کی نگرانی ممکن ہوگی اور جعلی یا غیر دستاویزی لین دین کی حوصلہ شکنی ہوگی، ماہرین کے مطابق اس اقدام سے ریونیو میں نمایاں اضافہ اور ٹیکس نظام میں بہتری متوقع ہے۔