خلیجی ہنگامی صورتحال، پورٹ قاسم میں بڑے پیمانے پر عارضی کارگو اسٹوریج کی منظوری، ڈی پی ورلڈ کو 16.9 ایکڑ رقبہ الاٹ
اسلام آباد(کسٹم بلیٹن) فیڈرل بورڈ آف ریونیو نے خلیجی خطے میں جاری کشیدگی اور جنگی نوعیت کی صورتحال کے باعث ملک میں کارگو کے دباو¿ کو کم کرنے کے لیے ہنگامی بنیادوں پر اہم فیصلہ کرتے ہوئے ڈی پی ورلڈ کے کیو آئی سی ٹی ٹرمینل کو بین الاقوامی ٹرانس شپمنٹ کارگو کے عارضی ذخیرہ کی اجازت دے دی ہے۔ اس اجازت کے تحت پورٹ قاسم اتھارٹی کے شمال مشرقی صنعتی زون میں واقع 16.9 ایکڑ پر مشتمل برتھ بیک اپ ایریا کو استعمال میں لایا جائے گا، جہاں بڑی مقدار میں کارگو یونٹس کو عارضی طور پر رکھا جا سکے گا۔اعلامیے میں اس مخصوص علاقے کی چاروں حدود بھی واضح کر دی گئی ہیں تاکہ کارگو کی نقل و حرکت اور سکیورٹی کو یقینی بنایا جا سکے، جبکہ یہ سہولت عارضی بنیادوں پر موجودہ ہنگامی حالات کے پیش نظر دی گئی ہے۔ حکام کے مطابق خلیجی صورتحال کے باعث شپنگ لائنز کی سرگرمیاں متاثر ہونے اور کارگو کے انبار لگنے کا خدشہ ہے، جس سے نمٹنے کے لیے یہ اقدام کیا گیا ہے۔مزید برآں اس فیصلے سے بندرگاہوں پر رش میں کمی، کارگو ہینڈلنگ میں تیزی اور سپلائی چین کے تسلسل کو برقرار رکھنے میں مدد ملے گی، جبکہ درآمد و برآمد کے شعبے سے وابستہ کاروباری طبقے کو بھی ممکنہ تاخیر اور اضافی اخراجات سے بچانے میں معاونت حاصل ہوگی۔
