ایف بی آرکاسپر ٹیکس وصولی کیلئے مہلت دینے پر غور
کراچی (کسٹم بلیٹن) فیڈرل بورڈ آف ریونیو نے سپر ٹیکس کی وصولی میں آسانی پیدا کرنے کیلئے کاروباری کمپنیوں کو 30 جون 2026 تک قسطوں کی بنیاد پر ادائیگی کی سہولت دینے پر آمادگی ظاہر کی ہے۔ صنعتی ذرائع کے مطابق یہ فیصلہ ایف بی آر کی قیادت اور کاروباری برادری کے نمائندوں کے درمیان ہونے والی متعدد ملاقاتوں کے بعد سامنے آیا ہے جن میں کاروباری شعبے نے مالی دباو¿ اور نقد کی روانی کے مسائل پر تشویش کا اظہار کیا تھا۔ ذرائع کا کہنا ہے کہ چیئرمین ایف بی آر راشد محمود لنگڑیال نے صنعتکاروں کے مسائل کو مثبت انداز میں دیکھتے ہوئے ادائیگی کے شیڈول میں کچھ نرمی پر اتفاق کیا ہے۔ تاہم فیصلہ کیا گیا ہے کہ سپر ٹیکس کی ادائیگی کو کیس ٹو کیس بنیاد پر دیکھا جائے گا اور کمپنیوں کو اپنی ٹیکس ذمہ داری قسطوں میں ادا کرنے کی اجازت دی جا سکتی ہے لیکن مکمل رقم 30 جون 2026 تک جمع کرانا لازمی ہوگا۔ اس اقدام کا مقصد کاروباری اداروں پر بڑھتے ہوئے مالی دباو¿ کو کم کرنا ہے کیونکہ ملک میں مہنگائی، پیداواری لاگت میں اضافہ اور معاشی غیر یقینی صورتحال پہلے ہی صنعتی شعبے کو متاثر کر رہی ہے۔ جنوری 2026 کے آخر میں فیڈرل کانسٹی ٹیوشنل کورٹ نے سپر ٹیکس کی وصولی کو قانونی قرار دیا تھا جس کے بعد ایف بی آر نے ریونیو ہدف کے حصول کیلئے ریکوری مہم کو مزید تیز کردیا تھا۔ کاروباری برادری نے سخت ریکوری پالیسی پر شدید ردعمل ظاہر کرتے ہوئے وزیر اعظم شہباز شریف سے مطالبہ کیا تھا کہ سپر ٹیکس کی ادائیگی کیلئے لچکدار طریقہ کار اختیار کیا جائے تاکہ صنعتوں کو بندش کے خطرے سے بچایا جا سکے۔ حکومتی ذرائع کے مطابق ایف بی آر چیئرمین نے کاروباری رہنماو¿ں کو مسئلہ حل کرنے کی یقین دہانی کرائی ہے تاہم ابھی تک اس حوالے سے کوئی باضابطہ نوٹیفکیشن جاری نہیں کیا گیا جبکہ حتمی فیصلے کا جلد اعلان متوقع ہے۔
