کراچی پورٹ پر کے آئی سی ٹی ٹرمینل میں خوفناک آتشزدگی، 20 کنٹینرز جل کر خاکستر

کراچی(کسٹم بلیٹن) کراچی پورٹ کے کراچی انٹرنیشنل کنٹینر ٹرمینل میں جمعہ کے روز اچانک شدید آگ بھڑک اٹھی جس کے نتیجے میں کم از کم 20 کنٹینرز مکمل یا جزوی طور پر جل گئے جبکہ حفاظتی اقدامات کے تحت دو جہازوں کی ہینڈلنگ عارضی طور پر معطل کر دی گئی۔ واقعے کے باعث بندرگاہ کی سرگرمیاں جزوی طور پر متاثر رہیں۔پورٹ ذرائع کے مطابق آگ کے آئی سی ٹی ٹرمینل کے اندر کنٹینرز کے ایک بڑے اسٹیک میں لگی، جس نے انتہائی تیزی سے پھیلتے ہوئے متعدد کنٹینرز کو اپنی لپیٹ میں لے لیا۔ ابتدائی اطلاعات کے مطابق آگ لگنے کی ممکنہ وجہ کیمیائی مواد سے بھرے کنٹینرز بتائی جا رہی ہے، جبکہ متاثرہ کنٹینرز میں الیکٹرانک اشیا، کیمیکلز، کپڑا اور لیتھیئم بیٹریاں بھی موجود تھیں، جس کے باعث آگ کی شدت میں اضافہ ہوا۔ریسکیو 1122 کے مطابق آگ اتنی تیزی سے پھیلی کہ کئی کنٹینرز بری طرح پھنس گئے۔ اطلاع ملتے ہی فائر فائٹنگ کا عمل فوری طور پر شروع کر دیا گیا اور ابتدائی مرحلے میں 13 فائر ٹینڈرز آگ پر قابو پانے کے لیے موقع پر پہنچائے گئے۔ شدید دھویں کے باعث ٹرمینل کے اطراف کا علاقہ متاثر ہوا جبکہ مزید فائر بریگیڈ ٹیموں کو الرٹ رکھا گیا۔آتشزدگی کے باعث پورٹ انتظامیہ نے حفاظتی نقط نظر سے دو جہازوں کی لوڈنگ اور ان لوڈنگ معطل کر دی جس سے بندرگاہی آپریشن جزوی طور پر متاثر ہوا۔ تاہم حکام کا کہنا ہے کہ دیگر حصوں میں سرگرمیاں محدود پیمانے پر جاری رہیں۔خوش قسمتی سے واقعے میں کسی جانی نقصان کی اطلاع نہیں ملی۔ تمام عملے کو بروقت محفوظ مقامات پر منتقل کر دیا گیا۔ پورٹ حکام نے واقعے کی تفصیلی رپورٹ طلب کر لی ہے تاکہ آگ لگنے کی اصل وجوہات، ممکنہ غفلت اور مالی نقصان کا درست اندازہ لگایا جا سکے۔فائر بریگیڈ اور ریسکیو اداروں کی جانب سے کئی گھنٹوں تک جاری رہنے والے آپریشن کے بعد آگ کو قابو میں کیا گیا، جبکہ قریبی کنٹینرز اور بندرگاہی تنصیبات کو مزید نقصان سے بچا لیا گیا۔