مضرصحت درآمدی چھالیہ ری ایکسپورٹ کرنے کے احکامات
کراچی (کسٹم بلیٹن) درآمدکنندگان کی جانب سے درآمدکی جانے والی مضرصحت چھالیہ کے سیکڑوں کنٹینرزکو ری ایکسپورٹ کرنے کے احکامات جاری کردیئے گئے ہیںعمل درآمدنہ کرنے والے درآمدکنندگان پر سخت قانونی کارروائی کا عندیہ بھی دے دیاہے۔تفصیلات کے مطابق وزارت قومی غذائی تحفظ و تحقیق کے تحت محکمہ تحفظ نباتات (ڈی پی پی) کے جاری کردہ نوٹس میں درآمدی شرائط کی خلاف ورزی پر چھالیہ کے متعدد کنسائمنٹس کو فوری ری ایکسپورٹ کرنے کا حکم دے دیا ہے، نوٹس کے مطابق 23 دسمبر 2025 اور 16 مارچ 2026 کی جاری کردہ ہدایات کے تحت آئی جی ایم ریکارڈ کی جانچ کے دوران یہ انکشاف ہوا کہ وہ تمام کنسائمنٹس جن کے بل آف لیڈنگ 23 دسمبر 2025 کے بعد جاری ہوئے وہ 16 مارچ 2026 کی ایک مرتبہ دی گئی رعایت کے دائرہ کار میں نہیں آتے، متاثرہ کنسائمنٹس مختلف درآمد کنندگان بشمول میسرز سارہ انٹرپرائزز، میسرز سلور انٹرپرائزز، میسرز شالیمار فوڈ پروڈکٹس، میسرز ازوان نیچرل اور میسرز این ایم انٹرپرائزز کے ہیں، جن میں ہزاروں میٹرک ٹن چھالیہ مختلف کنٹینرز کے ذریعے ساو¿تھ ایشیا پاکستان ٹرمینل اور کراچی انٹرنیشنل کنٹینر ٹرمینل پر موجود ہے، محکمہ تحفظ نباتات نے واضح ہدایت جاری کی ہے کہ تمام مضرصحت چھالیہ درآمدکرنے والے درآمدکنندگان کو نوٹس کا اجراءکردیاگیاہے کہ پندرہ (15) دن کے اندرکنسائمنٹس کو ری ایکسپورٹ کردیاجائے بصورت دیگر انہیں تلف کرنے کی سفارش کی جائے گی، یہ نوٹس پلانٹ پروٹیکشن ایڈوائزر و ڈائریکٹر جنرل کی منظوری سے جاری کیا گیا ہے جبکہ چیف کلکٹر کسٹمز اپریزمنٹ کراچی سمیت متعلقہ ادارے کو بھی اس پر فوری عملدرآمد کی ہدایت کی گئی ہے، حکام کے مطابق یہ اقدام درآمدی ضوابط کی سختی سے پابندی اور زرعی و ماحولیاتی تحفظ کو یقینی بنانے کے لیے اٹھایا گیا ہے۔
