طورخم بارڈر پر پاکستان کسٹمز کی بڑی کارروائی،اسلحہ اور گولہ بارود اسمگل کرنے کی منظم کوشش ناکام
طورخم(کسٹم بلیٹن)پاکستان کسٹمز نے طورخم بارڈر پر بروقت اورموثر کارروائی کرتے ہوئے اسلحہ اور گولہ بارود پاکستان اسمگل کرنے کی ایک بڑی اور منظم کوشش ناکام بنا دی۔ کارروائی کے دوران ایس ایم جی اور رائفل کے 21 ہزار سے زائد کارتوس سمیت دیگر غیر قانونی اسلحہ برآمد کر لیا گیا۔ذرائع کے مطابق مشکوک کھیپ کسٹمز اسٹیشن طورخم پر کارگو کی معمول کی جانچ پڑتال کے دوران سامنے آئی۔ذرائع کے مطابق طورخم بارڈرپر محکمہ کسٹمزنے خفیہ اطلاع پر گاڑی کو روک کرتفصیلی جانچ کے لیے این ایل سی امپورٹ ٹرمینل منتقل کیا گیا۔ جدید اسکینگ کے دوران حاصل ہونے والی تصاویر میں گاڑی کے اندر غیر معمولی ساخت اور بے ضابطگیاں سامنے آئیں، جس کے بعد گاڑی کی مکمل اور باریک بینی سے تلاشی لی گئی۔تفصیلی تلاشی کے نتیجے میں گاڑی کے خفیہ خانوں سے بھاری مقدار میں غیر قانونی اسلحہ اور گولہ بارود برآمد ہوا، جس میں ایس ایم جی اور رائفل کے ہزاروں کارتوس شامل ہیں۔ حکام کے مطابق اسلحے کی یہ کھیپ نہایت مہارت سے چھپائی گئی تھی، جو اس بات کی تصدیق کرتی ہے کہ اسمگلنگ کی یہ کوشش دانستہ اور منظم تھی، جس کا مقصد عوامی سلامتی اور ملکی امن و امان کو نقصان پہنچانا تھا۔واقعے کا مقدمہ درج کر لیا گیا ہے جبکہ کسٹمز حکام دیگر قانون نافذ کرنے والے اداروں کے ساتھ قریبی رابطے میں رہتے ہوئے اس اسمگلنگ نیٹ ورک کے تمام پہلوﺅں پر جامع تحقیقات کر رہے ہیں۔ مزید برآں، اس امر کا بھی جائزہ لیا جا رہا ہے کہ اس کارروائی میں ملوث عناصر کے ممکنہ سہولت کار کون ہیں اور اسلحہ کس مقصد کے لیے ملک میں داخل کیا جا رہا تھا۔فیڈرل بورڈ آف ریونیو نے اس موقع پر اپنے بیان میں واضح کیا ہے کہ پاکستان کسٹمز اسمگلنگ، غیر قانونی تجارت اور بدعنوانی کے مکمل خاتمے کے لیے پرعزم ہے اور قومی سلامتی، سرحدی تحفظ اور ملکی محصولات کے دفاع کے لیے سخت اور بلاامتیاز کارروائیاں جاری رکھی جائیں گی۔
