چھالیہ کی درآمد کیلئے نیا نظام نافذ، اسمگلنگ کے خاتمے اور قیمتوں میں کمی کی امید

کراچی(کسٹم بلیٹن) حکومت پاکستان نے چھالیہ کی درآمد کو منظم بنانے کیلئے نیا سخت نظام نافذ کردیا ہے جس کے تحت پری شپمنٹ انسپکشن، کیو آر کوڈ تصدیق اور لیبارٹری ٹیسٹنگ لازمی قرار دے دی گئی ہے۔محکمہ تحفظ نباتات کے نوٹیفکیشن کے مطابق اب صرف رجسٹرڈ برآمدکنندگان سے درآمد کی اجازت ہوگی جبکہ تصدیق شدہ اداروں کے ڈیجیٹل سرٹیفکیٹس بھی لازمی ہوں گے نئے نظام کے تحت محدود تعداد میں کنسائمنٹس کا فزیکل معائنہ کیا جائے گا جبکہ باقی کی دستاویزی جانچ پڑتال کے ذریعے کلیئرنس دی جائے گی حکام کے مطابق حالیہ سرحدی کشیدگی کے باعث اسمگلنگ مکمل طور پر رک گئی تھی جس کے نتیجے میں چھالیہ کی قیمت 4000 روپے فی کلو تک پہنچ گئی ماہرین کا کہنا ہے کہ قانونی درآمدی راستے کھلنے سے قیمتوں میں نمایاں کمی آئے گی اور مارکیٹ میں استحکام پیدا ہوگا یہ اقدام صحت عامہ کے حوالے سے بھی اہم قرار دیا جا رہا ہے کیونکہ غیرمعیاری اور مضر صحت اسمگل شدہ چھالیہ کے استعمال میں کمی آئے گی حکام کا کہنا ہے کہ اس نظام سے نہ صرف شفافیت بڑھے گی بلکہ حکومتی محصولات میں بھی اضافہ ہوگا