یونائیٹڈبینک کو 19 ارب کا ٹیکس نوٹس جاری کردیاگیا

کراچی (کسٹم بلیٹن) فیڈرل بورڈ آف ریونیو نے یونائیٹڈ بینک لمیٹڈ کو گزشتہ کئی مالی سالوں کیلئے انکم ٹیکس اور فیڈرل ایکسائز ڈیوٹی کی مد میں تقریباً 19ارب روپے کے ٹیکس ڈیمانڈ نوٹس جاری کردیئے ہیں۔ یہ ڈیمانڈ مالی سال 2025ءتک کے عرصے کو محیط ہے جس میں انکم ٹیکس سے متعلق سولہ اعشاریہ پینسٹھ ارب روپے کی رقم بھی شامل ہے۔ بینک انتظامیہ کے مالیاتی ریکارڈ اور معلومات کے مطابق یہ نوٹس مختلف ٹیکس سالوں کیلئے جاری کیے گئے ہیں اور ٹیکس قوانین کے تحت نظرثانی شدہ اسیسمنٹ آرڈرز بھی شامل ہیں۔ حکام نے دو ہزار تین سے دو ہزار پچیس تک کے ٹیکس سالوں کے حوالے سے کارروائی کی ہے جس میں ساتویں شیڈول سے پہلے کی قانونی شقوں کے تحت اضافی ٹیکس ڈیمانڈ بھی عائد کی گئی ہے۔ بینک انتظامیہ نے ان فیصلوں کے خلاف اپیل دائر کرتے ہوئے مو¿قف اختیار کیا ہے کہ متعلقہ اپیلیٹ فورمز سے جہاں انہیں ریلیف ملا ہے وہاں فیڈرل بورڈ آف ریونیو نے بھی اعلیٰ فورمز میں اپیل دائر کردی ہے جبکہ جہاں ریلیف نہیں ملا وہاں یونائیٹڈ بینک لمیٹڈ نے بھی اپنے حق میں اپیل دائر کی ہے۔ بینک کی انتظامیہ کو امید ہے کہ اپیلوں کے حتمی فیصلے ان کے موقف کے مطابق ہوں گے۔ مزید برآں ایف بی آر نے دو ہزار پانچ سے دو ہزار انیس تک کے عرصے کیلئے فیڈرل ایکسائز ڈیوٹی، سیلز ٹیکس اور ودہولڈنگ ٹیکس کی مانیٹرنگ بھی کی جس کے نتیجے میں دو اعشاریہ ترسٹھ ارب روپے کی اضافی ٹیکس ڈیمانڈ سامنے آئی ہے۔ بینک نے اس ڈیمانڈ کے خلاف بھی قانونی چارہ جوئی شروع کردی ہے اور انتظامیہ پر امید ہے کہ اپیلوں کے بعد حتمی فیصلہ ان کے حق میں ہوگا۔