درآمدی چینی پر ٹیکس ریلیف بڑھا دیاگیا

کراچی (کسٹم بلیٹن) فیڈرل بورڈ آف ریونیو نے سفید کرسٹل چینی کی درآمد پر دی گئی رعایتی انکم ٹیکس شرح کی مدت میں توسیع کرتے ہوئے اسے 28 فروری 2026 تک بڑھا دیا ہے۔ اس اقدام کا مقصد ملکی منڈی میں چینی کی قیمتوں کو مستحکم رکھنا اور طلب و رسد کے نظام کو بہتر بنانا ہے۔ ایف بی آر کی جانب سے 5 مارچ 2026 کو جاری کردہ ایس آر او 455(I)/2026 کے تحت چینی درآمد کنندگان کو درآمدی چینی پر صرف صفر اعشاریہ پچیس فیصد انکم ٹیکس ادا کرنا ہوگا جو کہ اس رعایت کی دوسری توسیع ہے۔ اس سے قبل یہ رعایت 30 ستمبر 2025 تک دی گئی تھی جسے بعد ازاں بڑھا کر 30 نومبر 2025 کیا گیا اور اب اسے مزید توسیع دی گئی ہے۔ حکومت نے پہلی مرتبہ جولائی 2025 میں سفید کرسٹل چینی کی درآمد پر یہ سہولت فراہم کی تھی تاکہ ملک میں سپلائی کے مسائل کے دوران چینی کی قیمتوں کو کنٹرول کیا جا سکے اور شہریوں کو ضروری اشیاءمناسب قیمت پر دستیاب رہیں۔ اس اسکیم کے تحت پانچ لاکھ میٹرک ٹن تک تجارتی درآمد کی اجازت دی گئی ہے تاکہ مارکیٹ کی فوری اور مستقبل کی ضروریات کو پورا کیا جا سکے۔ رعایت سے فائدہ اٹھانے کے لیے کچھ شرائط بھی مقرر کی گئی ہیں جن کے تحت چینی کی درآمد تجارت کے شعبہ یعنی ٹریڈنگ کارپوریشن آف پاکستان یا منظور شدہ نجی کمپنیوں کے ذریعے کوٹے اور مقررہ حدود کے مطابق کی جائے گی۔ مزید برآں درآمد شدہ چینی کے معیار کی تصدیق بھی لازمی قرار دی گئی ہے جس کے لیے کسی بین الاقوامی انسپیکشن فرم سے جانچ اور سرٹیفکیشن حاصل کرنا ہوگا تاکہ معیاری اشیائ کی درآمد کو یقینی بنایا جا سکے اور غیر معیاری چینی کی مارکیٹ میں فروخت کو روکا جا سکے۔