مشرق وسطیٰ کی ہنگامی صورت حال: گلف سروسز معطل، نئی برآمدی کارگو کی وصولی روک دی گئی

کراچی(کسٹم بلیٹن) مشرق وسطیٰ میں جاری غیر یقینی اور ہنگامی صورت حال کے باعث خلیجی روٹس پر کام کرنے والی بین الاقوامی شپنگ لائنز نے پاکستان سے گلف سروسز کے لیے بکنگ کی عارضی معطلی اور آپریشنز کو اگلے حکم تک روکنے کا اعلان کر دیا ہے۔ اس غیر معمولی پیش رفت کے بعد نے بھی فوری طور پر گلف ممالک کے لیے نئی برآمدی کارگو کی وصولی معطل کر دی ہے۔ٹرمینل انتظامیہ کی جانب سے جاری کردہ ایڈوائزری کے مطابق جب تک شپنگ لائنز اپنی گلف سروسز بحال کرکے بکنگ کا عمل دوبارہ شروع نہیں کرتیں، اس وقت تک خلیجی ممالک کے لیے بھیجے جانے والے کسی بھی نئے برآمدی مال کو ٹرمینل پر قبول نہیں کیا جائے گا۔ اعلامیے میں واضح کیا گیا ہے کہ یہ اقدام موجودہ حالات کے تناظر میں احتیاطی تدبیر کے طور پر اٹھایا گیا ہے تاکہ بندرگاہی نظام میں غیر ضروری دباﺅ اور کنسائمنٹس کے انبار سے بچا جا سکے۔تمام کسٹمز ایجنٹس، فریٹ فارورڈرز اور برآمد کنندگان کو ہدایت کی گئی ہے کہ وہ آئندہ اطلاع تک گلف کی جانب روانہ کیے جانے والے کارگو کو ٹرمینل نہ بھیجیں۔ انتظامیہ نے خبردار کیا ہے کہ اس ہدایت کے برعکس بھیجا گیا مال ٹرمینل پر قبول نہیں کیا جائے گا جس سے متعلقہ فریقین کو مالی اور آپریشنل مشکلات کا سامنا کرنا پڑ سکتا ہے۔تاہم اعلامیے میں یہ بھی واضح کیا گیا ہے کہ خلیجی ممالک کے علاوہ برآمدی کارگو کی وصولی اور شپمنٹ کا عمل معمول کے مطابق جاری رہے گا اور دیگر روٹس پر آپریشنز متاثر نہیں ہوں گے۔ ٹرمینل انتظامیہ کا کہنا ہے کہ صورتحال پر مسلسل نظر رکھی جا رہی ہے اور جیسے ہی شپنگ لائنز گلف سروسز بحال کریں گی اور بکنگ دوبارہ کھولیں گی، نئی ہدایات جاری کر دی جائیں گی۔بندرگاہی و تجارتی حلقوں کا کہنا ہے کہ خلیجی ممالک پاکستان کی برآمدات کے لیے ایک اہم منڈی ہیں، اس لیے گلف سروسز کی عارضی معطلی سے برآمد کنندگان کو وقتی مشکلات کا سامنا کرنا پڑ سکتا ہے۔ تاہم ماہرین کا خیال ہے کہ حالات معمول پر آتے ہی شپنگ سرگرمیاں دوبارہ بحال ہو جائیں گی۔انتظامیہ نے تمام متعلقہ فریقین سے تعاون کی اپیل کرتے ہوئے یقین دہانی کرائی ہے کہ صورتحال میں کسی بھی تبدیلی سے فوری طور پر آگاہ کیا جائے گا تاکہ تجارتی سرگرمیوں کو کم سے کم متاثر کیا جا سکے