افغان ٹرانزٹ ٹریڈ مرحلہ وار بحال، تین مراحل میں 300گاڑیوں کی کلیئرنس شروع

کراچی(کسٹم بلیٹن) پاکستان نے افغان طالبان حکومت کے ساتھ دوحہ، قطر میں طے پانے والے ”فوری جنگ بندی“ معاہدے کے بعد افغان ٹرانزٹ ٹریڈ (اے ٹی ٹی) کو مرحلہ وار بحال کردیا ہے۔ پاکستان نے 13اکتوبر2025کو پاک افغان سرحد پر بڑھتی ہوئی کشیدگی اور سیکیورٹی خدشات کے باعث افغان ٹرانزٹ کارگو ٹرانسپورٹیشن کو ملک بھر میں معطل کردیا تھا جس کے نتیجے میں تقریباً 300سے زائد گاڑیاں مختلف مقامات پر پھنس گئی تھیں۔ اب ابتدائی طور پر چمن کے راستے ٹرانزٹ ٹریڈ آپریشن بحال کر دیا گیا ہے۔ اس سلسلے میں ڈائریکٹوریٹ آف ٹرانزٹ ٹریڈ (کسٹمز) نے بدھ کے روز تفصیلی حکم نامہ جاری کیا ہے جس کے مطابق کارگو آپریشن کو تین مراحل میں مکمل کیا جائے گا۔ حکم نامے میں کہا گیا ہے کہ تمام معمول کے ٹرانزٹ ٹریڈ آپریشن ”فرسٹ اِن، فرسٹ آو¿ٹ“ (فی فو) کی بنیاد پر بیک لاگ کے کلیئر ہونے کے بعد بحال ہوں گے۔پہلے مرحلے میں ان 9گاڑیوں کو کلیئر کیا جائے گا جو فرینڈشپ گیٹ پر سرحد بند ہونے کے باعث واپس بھیجی گئی تھیں، ان گاڑیوں کا دوبارہ وزن اوراسکینگ کی جائے گی اور کسی بھی قسم کی تضاد کی صورت میں 100فیصدجانچ پڑتال کی جائے گی۔ دوسرے مرحلے میں ان 74گاڑیوں کو پراسیس کیا جائے گا جو این ایل سی بارڈر ٹرمینل یارڈ سے واپس کی گئی تھیں، ان گاڑیوں کا بھی دوبارہ وزن اوراسکینگ کے عمل سے گزارا جائے گا جبکہ اگر کسی فرق کی نشاندہی ہوئی تو ان کی مکمل تلاشی لی جائے گی۔ تیسرے مرحلے میں ہالٹنگ یارڈ میں موجود 217گاڑیوں کو کلیئر کرکے سرحد پار بھیجنے کی اجازت دی جائے گی۔حکم نامے میں مزید کہا گیا ہے کہ تمام واپس آنے والی یا روک دی گئی گاڑیوں کی نقل و حرکت کی تصاویر فرینڈشپ گیٹ پر حاصل کرکے ریکارڈ میں محفوظ کی جائیں تاکہ شفافیت اور دستاویزی ریکارڈ کو یقینی بنایا جا سکے۔ ٹرانزٹ ٹریڈ کی بحالی سے تاجروں، ٹرانسپورٹرز اور کارگو آپریٹرز کو نمایاں ریلیف ملنے کی توقع ہے جنہیں سرحدی بندش کے دوران بھاری نقصان کا سامنا رہا۔ حکام کے مطابق بحال شدہ ٹریڈ آپریشنز میں سیکیورٹی اور معائنے کے عمل کو مزید سخت کیا گیا ہے تاکہ کسی قسم کی اسمگلنگ یا غیر قانونی تجارت کی روک تھام یقینی بنائی جا سکے۔چمن بارڈر کو پاک افغان تجارت کا سب سے اہم زمینی تجارتی راستہ قرار دیا جاتا ہے جہاں سے روزانہ درجنوں ٹرک اور کارگو کنسائمنٹس دونوں ممالک کے درمیان نقل و حرکت کرتے ہیں۔ ٹرانزٹ ٹریڈ کی بحالی سے نہ صرف سرحدی تجارت میں روانی بحال ہوگی بلکہ دونوں ممالک کے درمیان تجارتی تعلقات میں بہتری کی توقع بھی ظاہر کی جارہی ہے۔