چاول کے کنٹینرز میں گڑ(شکر) کی اسمگلنگ،ملزم محمد آفاق کی ضمانت قبل از گرفتاری منظور
کراچی (کسٹم بلیٹن)خصوصی عدالت (کسٹمز، ٹیکسیشن اینڈ اینٹی اسمگلنگ کراچی نے چاول کی آڑ میں گڑ/شکر بیرون ملک اسمگل کرنے کے مقدمے میں نامزد ملزم محمد آفاق کی قبل از گرفتاری عبوری ضمانت منظور کر لی ہے۔اس سلسلے میںایڈوکیٹ انیل ضیاءکے دلائل کی روشنی میں عدالت نے ملزم کی ضمانت کا حکم جاری کیا۔تفصیلا ت کے مطابق محکمہ کسٹمزکی جانب سے درج کی جانے والی ایف آئی آرمیںمیسرز لیوش فوڈزکے گل محمد اور کلیئرنگ ایجنٹ میسرز ظفر انٹرپرائززکے ڈائریکٹرمحمدکامران اورمنیجرمحمدآفاق کو نامزدکیاگیا ،محکمہ کسٹمزنے الزام عائد کیاتھاکہ مذکورہ برآمدکنندہ نے کلیئرنگ ایجنٹ کے ساتھ ملک کر 8 کنٹینرز کے ذریعے ایک لاکھ87ہزار567 کلوگرام چاول متحدہ عرب امارات (جبل علی)برآمد کرنے کے لئے گڈزڈیکلریشن فائل کی تاہم رسک مینجمنٹ سسٹم کی جانب سے گرین چینل سے کلیئر ہونے کے بعد، کسٹمز حکام نے خفیہ اطلاعات کی بنیاد پرنجی ٹرمینل پر ان کنٹینرز کی جانچ پڑتال کی گئی،جانچ پڑتال کے دوران دو کنٹینرز سے چاول کی بوریوں کے پیچھے چھپایا گیا20500 کلوگرام ممنوعہ گڑ (شکر) برآمد ہوئی، جس کی مارکیٹ ویلیو لاکھوں روپے بتائی گئی ہے۔کسٹمز حکام کے مطابق اس اقدام سے نہ صرف ایکسپورٹ پالیسی آرڈر 2022 کی خلاف ورزی کی گئی بلکہ غیر قانونی ٹیکس چھوٹ (ڈی ایل ٹی ایل) حاصل کرنے کی کوشش بھی کی گئی۔ایف آئی آرمیں نامزدمیسرزظفرانٹرپرائززکے ایکسپورٹ منیجرملزم محمدآفاق نے گرفتاری سے بچنے کے لیے ایڈوکیٹ انیل ضیاءکے توسط سے خصوصی عدالت میں قبل از گرفتاری ضمانت کی درخواست دائر کی تھی۔ایڈوکیٹ انیل ضیاءنے عدالت کے سامنے موقف اختیار کیا کہ ان کے موکل کا اس مبینہ اسمگلنگ یا غلط بیانی سے بلاواسطہ کوئی تعلق نہیں ہے اور ان کا نام مقدمے میں بغیر کسی ٹھوس ثبوت کے شامل کیا گیا ہے۔ جس پر عدالت نے ملزم محمد آفاق کی ایک لاکھ روپے کے مچلکے اور شخصی ضمانت کے عوض عبوری ضمانت قبل از گرفتاری منظور کر لی۔
