آٹوپارٹس کی اسمگلنگ کے خلاف کریک ڈائون، کروڑوں روپے مالیت کے آٹو پارٹس برآمد

کراچی(کسٹم بلیٹن) کسٹمز انفورسمنٹ کراچی نے اسمگلنگ کے خلاف بڑی اور فیصلہ کن کارروائی کرتے ہوئے شہر کے مصروف تجارتی مرکز صدر میں قائم ایک منظم اور وسیع نیٹ ورک کو بے نقاب کر دیا، خفیہ اور مصدقہ اطلاع ملنے پر کلکٹر کسٹمز انفورسمنٹ عمر شفیق نے فوری ایکشن لیتے ہوئے معلومات ایڈیشنل کلکٹر یاسر وہاب کلور کے ذریعے اینٹی اسمگلنگ آرگنائزیشن کو منتقل کیں، جس کے بعد ایک خصوصی چھاپہ مار ٹیم تشکیل دی گئی، آئی پی ایس افسر رانا راشد کی نگرانی میں ٹیم نے مدینہ پلازہ کی تیسری، چوتھی، پانچویں اور چھٹی منزل پر بیک وقت کارروائی کرتے ہوئے مختلف گوداموں اور دفاتر کی مکمل تلاشی لی، اس دوران بڑی مقدار میں اسمگل شدہ آٹو پارٹس برآمد کیے گئے جو حجم کے اعتبار سے تقریباً 28 مزدا ٹرکوں کے برابر ہیں، حکام کے مطابق یہ برآمدگی نہ صرف اسمگلنگ کے منظم نیٹ ورک کی نشاندہی کرتی ہے بلکہ اس کے پیچھے ایک مضبوط سپلائی چین کے ہونے کا بھی ثبوت ہے، ضبط شدہ سامان کی مالیت کروڑوں روپے بتائی جا رہی ہے، تمام مال کو قانونی کارروائی کے لیے کسٹمز پبلک فیسلٹی بانڈ منتقل کر دیا گیا ہے، جبکہ نیٹ ورک میں ملوث مرکزی کرداروں، سہولت کاروں اور خریداروں کی نشاندہی کے لیے تحقیقات کا دائرہ وسیع کر دیا گیا ہے، حکام کا کہنا ہے کہ یہ کارروائی شہر میں اسمگلنگ کے خلاف جاری مہم کا حصہ ہے اور مستقبل میں بھی ایسی سخت کارروائیاں جاری رہیں گی تاکہ قومی معیشت کو نقصان پہنچانے والے عناصر کا خاتمہ کیا جا سکے