سگریٹس کی صنعت کی الیکٹرانک مانیٹرنگ لازمی قرار، تمام فیکٹریوں کوکیمروں کی فوری تنصیب کا حکم
اسلام آباد(کسٹم بلیٹن) فیڈرل بورڈ آف ریونیو نے ٹیکس چوری کی روک تھام کے لئے سگریٹ کی پیداوارکے تمام مراحل کی الیکٹرانگ مانیٹرنگ کو لازمی قراردیتے ہوئے تمام تمباکو مینوفیکچرنگ یونٹس کو ہدایت جاری کی ہے کہ وہ اپنی پیداواری سہولیات کے مخصوص مقامات پر فوری طور پر کیمرے نصب کریں۔ایف بی آر کی جانب سے نوٹیفکیشن میں واضح کیا گیا ہے کہ کسی بھی فیکٹری کی جانب سے پیداوار کو اس وقت تک کاروباری احاطے سے منتقل نہیں کیا جا سکے گا جب تک پیداواری عمل کی نگرانی مکمل طورپر نصب کئے جانے والے کیمروں کے ذریعے گزر نہ جائے؛ یہ ہدایات ٹیکس شفافیت، پروڈکشن ریکارڈز کی درستگی اور ممکنہ ٹیکس چوری یا غیر رجسٹرڈ آو¿ٹ لیٹس کی روک تھام کے مقصد سے جاری کی گئی ہیں اور نوٹیفکیشن ممبر ان لینڈ ریونیو آپریشنز، ایف بی آر کی منظوری سے جاری ہو کر فوری طور پر نافذالعمل ہو گئی ہیں، ساتھ ہی مینوفیکچررز سے توقع کی گئی ہے کہ وہ کیمروں کی تنصیب، ریکارڈنگ اسٹوریج اور متعلقہ تکنیکی شرائط پر بروقت عمل درآمد کریں گے تاکہ مانیٹرنگ کے ذریعے پیداواری عمل کے شفاف اور قابلِ یقین ریکارڈ فراہم کیے جا سکیں۔
