پرسنل بیگیج کے تحت گاڑی درآمد کرنے کی سہولت ختم

اسلام آباد(کسٹم بلیٹن) وفاقی حکومت نے درآمدی پالیسی آرڈر 2022 میں اہم ترامیم کرتے ہوئے پرسنل بیگیج کے تحت گاڑی درآمد کرنے کی سہولت ختم کر دی ہے۔ اس ضمن میں حکومت کی جانب سے ایس آراو61 جاری کردیاگیاہے جو امپورٹس اینڈ ایکسپورٹس (کنٹرول) ایکٹ 1950 کے تحت نافذ العمل ہوگا۔نوٹیفکیشن کے مطابق درآمدی پالیسی کے پیراگراف 16، اپنڈکس بی اور اپنڈکس ای میں متعدد ترامیم کی گئی ہیں، جن کے تحت اب گاڑیاں صرف تحفہ یا ٹرانسفرآف ریزیڈنٹ اسکیم کے تحت ہی درآمد کی جاسکیں گی، جبکہ ذاتی سامان کے تحت گاڑی منگوانے کی اجازت ختم کر دی گئی ہے۔حکومتی فیصلے کے مطابق گاڑی درآمد کرنے کے لیے گزشتہ تین سال کی مدت کو واضح کرتے ہوئے اسے 850 دن قرار دیا گیا ہے، جو گزشتہ درآمد ی گڈز ڈیکلریشن فائل ہونے کی تاریخ سے شمار ہوگی۔ اسی طرح ایک ہی خاندان میں گاڑی تحفے میں دینے کی حد کو دو سے بڑھا کرتین کر دیا گیا ہے۔ترمیمی نوٹیفکیشن میں یہ بھی واضح کیا گیا ہے کہ تحفہ یاٹرانسفرآف ریزیڈنٹ اسکیم کے تحت درآمد کی جانے والی گاڑیاںکم از کم ایک سال تک ناقابلِ منتقلی ہوں گی۔ اس کے علاوہ ایسی تمام گاڑیوں پر وہی حفاظتی، ماحولیاتی اور ریگولیٹری معیار لاگو ہوں گے جو کمرشل بنیادوں پر استعمال شدہ گاڑیوں کی درآمد پر نافذ ہیں۔نوٹیفکیشن کے مطابق ٹرانسفرآف ریزیڈنٹ اسکیم کے تحت گاڑی صرف اسی ملک سے درآمد کی جا سکے گی جہاں اوورسیز پاکستانی مقیم ہو۔ حکام کا کہنا ہے کہ ان ترامیم کا مقصد گاڑیوں کی درآمد کے نظام کو شفاف بنانا، غلط استعمال کی روک تھام اور ماحولیاتی و حفاظتی معیارات کو یقینی بنانا ہے۔