ایچ آر آئی ایس ڈیٹا اپڈیٹ نہ کرنے پر ایف بی آر برہم، فیلڈ دفاتر کو 10 دن کی مہلت

اسلام آباد(کسٹم بلیٹن) فیڈرل بورڈ آف ریونیو (ایف بی آر) کی مجاز اتھارٹی نے فیلڈ دفاتر کی جانب سے ہیومن ریسورس انفارمیشن سسٹم کا ڈیٹا اپڈیٹ نہ کرنے پر سخت برہمی کا اظہار کیا ہے۔ اس حوالے سے بورڈ کی جانب سے متعدد بار ہدایات جاری کی جا چکی تھیں تاہم اس کے باوجود مطلوبہ ڈیٹا اپڈیٹ نہیں کیا گیا۔ایف بی آر کی جانب سے جاری مراسلے میں تمام فیلڈ فارمیشنز کو ہدایت کی گئی ہے کہ وہ نوٹیفکیشن کے اجراءکی تاریخ سے دس (10) دن کے اندر اندر اپنا مکمل ہیومن ریسورس انفارمیشن سسٹم کا ڈیٹا ہر صورت اپڈیٹ کریں۔نوٹیفکیشن کے مطابق ہیومن ریسورس انفارمیشن سسٹم کے تمام یوزر آئی ڈیز اور پاس ورڈز پہلے ہی متعلقہ ایڈیشنل کلکٹرز/ڈپٹی کلکٹرز (ہیڈ کوارٹرز) کو فراہم کیے جا چکے ہیں، جو اس وقت ڈیٹا اپڈیٹ کرنے کے ذمہ دار ہیں۔مزید کہا گیا ہے کہ ڈیٹا اپڈیٹ کے دوران کسی بھی قسم کی تکنیکی مشکل کی صورت میں محمد قاسم علوی، اسسٹنٹ ڈائریکٹر (ایم آئی ایس) سے فون نمبر0519203354 پر رابطہ کیا جا سکتا ہے۔ایف بی آر نے ہدایت کی ہے کہ ہیومن ریسورس انفارمیشن سسٹم میں موجود ملازمین کی ورکنگ اسٹرینتھ کو دفتر کے پے رول کے ساتھ لازمی طور پر ری کنسائل کیا جائے تاکہ ڈیٹا کی درستگی کو یقینی بنایا جا سکے۔ اس مقصد کے لیے ہر دفتر کی **ڈسپوزیشن لسٹ** بھی مراسلے کے ساتھ منسلک کی گئی ہے۔نوٹیفکیشن میں واضح کیا گیا ہے کہ اگر کسی قسم کی کمی یا خامی سامنے آئے تو اس کی اطلاع آن لائن کمنٹس کے ذریعے اور ہارڈ کاپی کی صورت میں 10 فروری 2026 تک بورڈ کو بھجوانا لازم ہوگا تاکہ آٹومیشن سیکشن بروقت ازالہ کر سکے۔ایف بی آر کے مطابق یہ ہدایات مجاز اتھارٹی کی منظوری سے جاری کی گئی ہیں اورسختی سے عملدرآمد کی ہدایت کی گئی ہے۔