ایف بی آر نے درآمدکنسائمنٹس کی کلیئرنس کے لئے پوسٹ پیمنٹ جی ڈی سسٹم متعارف کرا دیا
کراچی (کسٹم بلیٹن )فیڈرل بورڈ آف ریونیو نے درآمدی کنسائمنٹس کی کلیئرنس کے عمل کو مزید سہل اور موثر بنانے کے لیے پوسٹ پیمنٹ جی ڈی سسٹم متعارف کرا دیا ہے، جس کے تحت اب کنسائمنٹس کے جہاز کے پہنچنے سے پہلے اور ڈیوٹی و ٹیکسز کی ادائیگی کے بغیر جی ڈی فائل کی جا سکے گی۔اس سلسلے میں آل پاکستان کسٹمز ایجنٹس ایسوسی ایشن کی جانب سے ایک آگاہی پروگرام کا انعقاد کیا گیا، جس کا مقصد پوسٹ پیمنٹ جی ڈی فائلنگ کے طریقہ کار، سہولتی اقدامات سے آگاہی اور ڈیمرج فری کلیئرنس کے نظام کو بہتر بنانا تھا تاکہ کلیئرنس میں تاخیر اور تجارتی بوجھ کو کم کیا جا سکے۔اس سلسلے میں آل پاکستان کسٹمز ایجنٹس ایسوسی ایشن کے چیئرمین ارشد خورشید نے کہا کہ ایف بی آر کا یہ اقدام ایک گیم چینجر ثابت ہوگا۔ انہوں نے کہا کہ اس نظام کے نفاذ سے بندرگاہوں پر موجود کنٹینرز کی رش ختم ہو جائے گی۔ ان کا کہنا تھا کہ اس سے قبل جہاز لگنے سے پہلے ڈیوٹی و ٹیکسز کی ادائیگی کرنا پڑتی تھی اور اگر کسی وجہ سے کنسائمنٹ شارٹ شپڈ ہو جاتی تو ادا کی گئی رقم ریفنڈ میں چلی جاتی تھی، جس سے درآمد کنندگان کو مشکلات کا سامنا کرنا پڑتا تھا۔ اب ڈیوٹی و ٹیکسز ادا کیے بغیر جی ڈی فائل کی جا سکے گی۔ایف پی سی سی آئی کے سابق نائب صدر خرم اعجاز نے پوسٹ پیمنٹ جی ڈی سسٹم کا خیرمقدم کرتے ہوئے کہا کہ اس اقدام کے تحت جہاز کے پورٹ پر لنگرانداز ہونے سے قبل کنسائمنٹس کی کلیئرنس ممکن ہو سکے گی۔ انہوں نے بتایا کہ اس سسٹم کی بدولت جب تک جہاز پورٹ پر پہنچے گا اس دوران جی ڈی کا پراسیس مکمل کر لیا جائے گا، جس کے بعد کنسائمنٹ کی کلیئرنس کے وقت ڈیوٹی و ٹیکسز ادا کر کے سامان حاصل کیا جا سکے گا۔انہوں نے مزید کہا کہ نئے نظام کے نفاذ سے وہ رقوم جو پہلے ڈیوٹی و ٹیکسز کی مد میں طویل عرصے تک پھنس جاتی تھیں، اس مسئلے کا خاتمہ ہو گا اور درآمد کنندگان پر مالی بوجھ میں نمایاں کمی آئے گی۔
