ڈرائی پورٹ پر سیلف کلیئرنس کا نیا نظام نافذ

کراچی (کسٹم بلیٹن) کلکٹریٹ آف کسٹمز اپریزمنٹ (ایسٹ) نے مغلپورہ ڈرائی پورٹ میں سیلف کلیئرنس کے طریقہ کار میں اہم تبدیلی کرتے ہوئے واضح اور سخت ہدایات جاری کر دی ہیں۔ اس فیصلے کا مقصد کسٹمز کلیئرنس کے عمل کو سادہ، شفاف اور بدعنوانی سے پاک بنانا ہے۔کسٹمز حکام کے مطابق اب سیلف کلیئرنس کی سہولت کے تحت گڈز ڈیکلریشن صرف خود امپورٹر فائل کر سکے گا، یا پھر اس کا وہ ملازم یا نمائندہ جو ادارے کی جانب سے باقاعدہ طور پر مجاز ہو۔ اس کے علاوہ کسی بھی کسٹمز کلیئرنگ ایجنٹ یا اس کے نمائندے کو، چاہے اس کے پاس امپورٹر کا اجازت نامہ یا ورک پرمٹ موجود ہو، سیلف کلیئرنس کے معاملات میں کسی قسم کی نمائندگی یا کاروبار کرنے کی اجازت نہیں ہوگی۔حکم نامے میں یہ بھی واضح کیا گیا ہے کہ اگر کسی کلیئرنگ ایجنٹ نے اس پابندی کی خلاف ورزی کی تو اس کے خلاف قانونی کارروائی کی جائے گی، جس کے نتیجے میں اس کا کسٹمز لائسنس منسوخ بھی کیا جا سکتا ہے۔یہ نیا نظام یکم فروری 2026 سے نافذ العمل ہوگا۔ تمام اسسٹنٹ اور ڈپٹی کلکٹرز، ایگزامن آفیسر اور دیگر متعلقہ عملے کو ہدایت دی گئی ہے کہ وہ اس فیصلے پر سختی سے عمل درآمد کروائیں۔ اس کے ساتھ ساتھ کسٹمز کلیئرنگ ایجنٹس ایسوسی ایشن لاہور سمیت تمام متعلقہ دفاتر کو بھی اس حکم نامے سے آگاہ کر دیا گیا ہے۔کسٹمز حکام کا کہنا ہے کہ اس اقدام سے سیلف کلیئرنس کا اصل مقصد حاصل ہوگا، غیر ضروری مداخلت کا خاتمہ ممکن ہو سکے گا اور امپورٹرز کو براہِ راست اور شفاف سہولت میسر آئے گی۔