اسلام آباد میں جائیدادوں کی نئی ویلیوایشن عارضی طور پر معطل، پرانا نوٹیفکیشن بحال

اسلام آباد(کسٹم بلیٹن)فیڈرل بورڈ آف ریونیو نے اسلام آباد میں غیر منقولہ جائیدادوں کی حقیقی مارکیٹ ویلیوز سے متعلق جاری کردہ نیا ایس آراو 2392کو عارضی طور پر معطل کرنے کا فیصلہ کر لیا ہے۔ذرائع کے مطابق، ملک بھر میں جائیدادوں کی ویلیوایشن ٹیبلز 29 اکتوبر 2024 کو نظرثانی کے بعد نافذ کی گئی تھیں، تاہم ضلع اسلام آباد کو ایک زیر التواءشکایت کی وجہ سے اس عمل سے الگ رکھا گیا تھا جو وفاقی ٹیکس محتسب (ایف ٹی او) کے سامنے زیر سماعت تھی۔ بعد ازاں اسلام آباد کے لیے علیحدہ طور پرمذکورہ ایس آراو جاری کیا گیا۔تاہم، ریئل اسٹیٹ ایسوسی ایشنز اور دیگر متعلقہ حلقوں نے ایف بی آر سے رابطہ کرتے ہوئے اعتراض اٹھایا کہ متعدد سیکٹرز اور علاقوں میں مقرر کی گئی ویلیوز اصل مارکیٹ ریٹس سے کہیں زیادہ ہیں، جس سے خریداروں اور سرمایہ کاروں کو شدید مشکلات کا سامنا ہے۔ایف بی آر کی جانب سے موصول ہونے والے اعتراضات کا تفصیلی جائزہ لیا گیا، جس کے بعد یہ بات تسلیم کی گئی کہ کچھ علاقوں میں ریئل اسٹیٹ ایسوسی ایشنز کے اعتراضات درست ہیں۔ اس صورتحال کے پیش نظر اسلام آباد کے لیے ویلیوایشن ٹیبل کی دوبارہ جانچ اور نظرثانی کا فیصلہ کیا گیا ہے۔ایف بی آر کے مطابق مذکورہ ایس آراوکو 31 جنوری 2026 تک یا نظرثانی شدہ نیا نوٹیفکیشن جاری ہونے تک (جو بھی پہلے ہو) معطل رکھا جائے گا۔ اس دوران 27جولائی2022کو جاری کیاجانے والاایس آراو1180اورترمیم شدہ ایس آراو1610بدستور نافذ العمل رہے گا۔نوٹیفکیشن کے مطابق یہ فیصلہ مجاز اتھارٹی کی منظوری سے جاری کیا گیا ہے۔ ریئل اسٹیٹ سے وابستہ حلقوں نے اس اقدام کو خوش آئند قرار دیتے ہوئے امید ظاہر کی ہے کہ نئی ویلیوایشن زمینی حقائق اور مارکیٹ ریٹس سے ہم آہنگ ہوگی