کسٹمز ایئرپورٹس کراچی کی بڑی کارروائی، پانچ کروڑسے زائد مالیت کی چرس اسمگل کرنے کی دو کوششیں ناکام
کراچی (کسٹم بلیٹن)کلکٹریٹ آف کسٹمز (ایئرپورٹس) کراچی کے ایئر کارگو کنٹرول یونٹ نے انٹرنیشنل میل آفس کراچی کے ذریعے منشیات اسمگل کرنے کی دو بڑی کوششیں ناکام بناتے ہوئے مجموعی طور پر ایک کلو870گرام چرس برآمد کر لی، جس کی مجموعی مالیت پانچ کروڑ 74لاکھ30ہزارروپے بتائی گئی ہےتفصیلات کے مطابق یہ کارروائیاں 21 جنوری 2026 کو امریکہ سے آنے والے مشتبہ پارسلز کی معمول کی اسکینگ اور جانچ پڑتال کے دوران عمل میں آئیں۔ ایک پارسل جس میںشرٹس ظاہر کی گئی تھیں، تاہم پارسل کی تلاشی کے دوران 370 گرام چرس برآمد ہوئی، جس کی مالیت ایک کروڑ13 لاکھ60ہزار روپے ہے۔جبکہ دوسری کارروائی میں ایک اور پارسل جیسے نائلون کارپٹ کے نمونے ظاہر کیا گیا تھا، اس پارسل سے ایک کلو500گرام چرس برآمد کی گئی، جو نہایت مہارت سے چھپا کر اسمگل کی جا رہی تھی۔ اس چرس کی مالیت چار کروڑ60 لاکھ70 ہزار روپے بتائی گئی ہے۔کسٹمز حکام کے مطابق دونوں پارسلز کے خلاف الگ الگ مقدمات درج کر لیے گئے ہیں۔ ذرائع نے بتایاکہ برآمدکی گئی جس انٹرنیشنل میل آفس میں اسسٹنٹ کلکٹر ایئر کارگو کنٹرول یونٹ کی نگرانی میں روزمرہ کی رسک پروفائلنگ اور جانچ پڑتال کے طریقہ کار کے تحت کی گئیں۔ذرائع کا کہناہے کہ برآمد کی گئی منشیات کو کسٹمز قوانین کے تحت ضبط کر لیا گیا ہے جبکہ اس ضمن میں مزید قانونی کارروائی جاری ہے۔ایف بی آر نے اس عزم کا اعادہ کیا ہے کہ وہ انٹرنیشنل میل آفس سمیت تمام چینلز کے ذریعے منشیات کی اسمگلنگ اور غیر قانونی تجارت کے سدباب کے لیے موثر اور بلاامتیاز کارروائیاں جاری رکھے گا۔
