اسلام آباد ایئرپورٹ ،بھاری مقدارمیں منشیات اسمگل کرنے کی کوشش
اسلام آباد (کسٹم بلیٹن) ایئرپورٹس سیکیورٹی فورس (اے ایس ایف) نے اسلام آباد انٹرنیشنل ایئرپورٹ پر منشیات اسمگلنگ کی ایک اور بڑی کوشش ناکام بنا دی۔ اے ایس ایف کے تربیت یافتہ اور فرض شناس اہلکاروں نے دبئی جانے والی پرواز کے ایک مسافر کے سامان کی تلاشی کے دوران آٹا گوندھنے والی مشین کے خفیہ خانوں سے ایک کلو706گرام کرسٹل آئس، ہیروئن اور 216 گرام نشہ آور گولیاں برآمد کر لیں۔ ذرائع کے مطابق یہ کارروائی ادارے کی پیشہ ورانہ مہارت، غیر معمولی تفتیشی صلاحیت اور بروقت حکمتِ عملی کا مظہر ہے جس نے نہ صرف بین الاقوامی اسمگلنگ نیٹ ورک کے عزائم کو ناکام بنایا بلکہ ایئرپورٹ کی ساکھ کے تحفظ میں اے ایس ایف کے عزم کو مزید مستحکم کیا۔ گرفتار مسافر کو ابتدائی تفتیش کے بعد برآمد شدہ منشیات سمیت مزید قانونی کارروائی کے لیے اینٹی نارکوٹکس فورس کے حوالے کر دیا گیا ہے۔
