ڈیجیٹل اصلاحات سے شفافیت اور ریونیو میں نمایاں اضافہ ہوا، سید شکیل شاہ
کراچی(کسٹم بلیٹن) انٹرنیشنل کسٹمز ڈے کے موقع پر منعقدہ تقریب سے خطاب کرتے ہوئے ممبر کسٹمز آپریشنز سید شکیل شاہ نے کہا ہے کہ پاکستان کسٹمز تیزی سے روایتی دستی نظام سے مکمل ڈیجیٹل نظام کی طرف منتقل ہو رہا ہے، جس کے مثبت نتائج ریونیو، نفاذ اور تجارتی سہولت کاری کی صورت میں سامنے آرہی ہیں۔انہوں نے بتایا کہ پاکستان کسٹمز نے رواں مالی سال کے دوران 2 کھرب 31 ارب روپے کی تاریخی ریونیو وصولی کی ہے، جو گزشتہ مالی سال کے مقابلے میں 20 فیصد زیادہ ہے، جبکہ کسٹمز ڈیوٹی اور ٹیکسوں کی مجموعی وصولی میں 48 فیصد اضافہ ریکارڈ کیا گیا ہے۔سید شکیل شاہ نے کہا کہ ڈیجیٹلائزیشن، رسک مینجمنٹ سسٹم اور آٹومیشن کے ذریعے نہ صرف کلیئرنس کے عمل کو تیز بنایا گیا ہے بلکہ بدعنوانی کے امکانات میں بھی نمایاں کمی آئی ہے۔
انہوں نے بتایا کہ پاکستان کسٹمز نے سال بھر میں 38 لاکھ 50 ہزار کنٹینرز کی موثر کلیئرنس کی۔اسمگلنگ کے خلاف کارروائیوں کا ذکر کرتے ہوئے انہوں نے کہا کہ پاکستان کسٹمز نے رواں سال کے دوران 41 ارب روپے مالیت کا اسمگل شدہ سامان ضبط کیا۔ان کے مطابق اسمگلنگ کے خلاف سخت اورموثر اقدامات کے نتیجے میں پیٹرولیم مصنوعات، ٹائروں اور ٹیکسٹائل سمیت مختلف شعبوں میں قانونی درآمدات میں نمایاں اضافہ ہوا ہے، جس سے قومی خزانے کو براہ راست فائدہ پہنچا ہے۔انہوں نے کہا کہ غیر قانونی تجارت کے خلاف کریک ڈاﺅن دراصل قانونی کاروبار کے تحفظ اور ملکی معیشت کی مضبوطی کے لیے ناگزیر ہے، اور پاکستان کسٹمز آئندہ بھی ڈیجیٹل اصلاحات اور مو¿ثر نفاذ کے ذریعے ریونیو میں اضافہ اور قانونی تجارت کے فروغ کے لیے اقدامات جاری رکھے گا۔اس موقع پر چیف کلکٹر کسٹمز واجد علی، کلکٹر کسٹمز انفورسمنٹ معین الدین وانی، مختلف ممالک کے سفارتکار ،ڈی جی رینجرزاور کسٹمز افسران کی بڑی تعداد موجود تھی۔
