فیڈرل ٹیکس محتسب سے اعزازی مشیرقمرالاسلام کی ملاقات، کسٹمز کلیئرنس اور تجارتی سہولت کاری پر تبادلہ خیال
کراچی (کسٹم بلیٹن)فیڈرل ٹیکس محتسب (ایف ٹی او) کے اعزازی مشیر قمرالاسلام نے اسلام آباد میں فیڈرل ٹیکس محتسب ایم۔ ظفرالحق حجازی سے ان کے دفتر میں ملاقات کی اور انہیں عہدہ سنبھالنے پر دلی مبارکباد پیش کی۔ملاقات کے دوران باہمی دلچسپی کے امور پر تفصیلی تبادلہ خیال کیا گیا، جس میں بالخصوص آل پاکستان کسٹمز ایجنٹس ایسوسی ایشن (ایپکا) کے کسٹمز کلیئرنس کے عمل میں کردار پر گفتگو ہوئی۔ اس موقع پر ایپکا کی جانب سے تجارتی سہولت کاری، درآمد و برآمد کے عمل میں درپیش مسائل کے حل، اور بزنس کمیونٹی کو درپیش رکاوٹوں کے ازالے کے لیے متعلقہ اسٹیک ہولڈرز کے ساتھ روابط اور تعاون پر بھی روشنی ڈالی گئی۔ قمرالاسلام نے اس امر پر زور دیا کہ کسٹمز، ٹیکس حکام اور بزنس کمیونٹی کے درمیاموثر رابطہ اور ہم آہنگی شفافیت، تیز تر کلیئرنس اور شکایات کے بروقت ازالے کے لیے ناگزیر ہے، جس میں فیڈرل ٹیکس محتسب کا کردار نہایت اہم ہے۔ملاقات کے اختتام پر قمرالاسلام نے فیڈرل ٹیکس محتسب کو کراچی کے دورے کی باضابطہ دعوت دی، جسے مسٹر ظفرالحق حجازی نے خوش دلی سے قبول کر لیا۔اس موقع پر لیگل ایڈوائزر الماس علی جووندھا بھی موجود تھے۔
