ممبر کسٹمز سے ایپکاکے وفد کی ملاقات، لائسنسنگ، اسکینگ اور پوائنٹ سسٹم پر اہم پیش رفت

کراچی(کسٹم بلیٹن) آل پاکستان کسٹمز ایجنٹس ایسوسی ایشن کے چیئرمین ارشد خورشید کی قیادت میں ایک اعلیٰ سطحی وفد نے ممبر کسٹمز (آپریشن) شکیل شاہ سے کراچی کسٹم ہاﺅس میں ملاقات کی، جس میں کسٹمز ایجنٹس کو درپیش اہم مسائل اور اصلاحات پر تفصیلی تبادلہ خیال کیا گیا۔وفد میں قمر الاسلام، اشد جمال، اختر شیروانی، عاصم جدون اور اطہر بیگ شامل تھے۔ اجلاس کے دوران پوائنٹ اسکورنگ سسٹم کے طریقہ کار، عارضی لائسنس کی تجدید کی مدت، اور کنسائمنٹس کی اسکینگ کے موجودہ نظام پر خصوصی طور پر غور کیا گیا۔ممبر کسٹمز (آپریشنز) شکیل شاہ نے وفد کے نکات کو غور سے سنا اور اس بات سے اتفاق کیا کہ ان معاملات کے حل کے لیے مشترکہ حکمت عملی اپنائی جائے گی۔ اس سلسلے میں ایف بی آر اور آل پاکستان کسٹمز ایجنٹس ایسوسی ایشن کے نمائندوں پر مشتمل ایک مشترکہ کمیٹی قائم کرنے کی منظوری دی گئی، جو چیف کلکٹر (ساﺅتھ) کی نگرانی میں کام کرے گی۔اجلاس میں اس بات پر بھی غور کیا گیا کہ عارضی لائسنس کی تجدید کو 12 ماہ تک بڑھایا جائے تاکہ کسٹمز ایجنٹس کو کاروباری تسلسل میں سہولت مل سکے۔ علاوہ ازیں، موجودہ اسکینگ نظام کو آپریشنل استعداد کے مطابق مزیدموثر اور متوازن بنانے کی ضرورت پر بھی زور دیا گیا تاکہ غیر ضروری تاخیر اور مشکلات کا خاتمہ کیا جا سکے۔ذرائع کے مطابق یہ پیش رفت کسٹمز ایجنٹس کے دیرینہ مطالبات کی جانب ایک مثبت قدم ہے، جس سے نہ صرف کاروباری ماحول بہتر ہوگا بلکہ کسٹمز کلیئرنس کے عمل میں شفافیت اور رفتار بھی آئے گی۔