افغا ن ٹرانزٹ ٹریڈکے261 کنٹینرز کو ری ایکسپورٹ کاحکم،خلاف ورزی پر سخت کارروائی ہوگی
کراچی(کسٹم بلیٹن) فیڈرل بورڈ آف ریونیونے پاک افغان سرحد کی طویل بندش کے باعث مختلف مقامات پر پھنس جانے والے افغان ٹرانزٹ کارگو سے متعلق اہم ہدایات جاری کرتے ہوئے ملک بھر کے متعلقہ بانڈڈ کیریئرز اور کلیئرنگ ایجنٹس کو فوری اقدامات کا حکم دے دیا ہے، ایف بی آر اور وزارت تجارت کی جانب سے جاری مراسلوں میں کراچی کی بندرگاہوں اور مقررہ بارڈر کراسنگ پوائنٹس پر موجود ٹرانزٹ کارگو کو ری ایکسپورٹ کی اجازت دی گئی ہے تاہم تازہ ڈیٹا تجزیے اور ریکارڈ کی جانچ پڑتال سے انکشاف ہوا ہے کہ بڑی تعداد میں کنٹینرز تاحال راستے میں یا مختلف بارڈر پوائنٹس پر موجود ہیں اور انہیں کراچی پورٹس پر واپس نہیں لایا گیا، حکام کے مطابق 167 گاڑیوں پر مشتمل 261 کنٹینرز ایسے ہیں جن کے لیے اب تک ریورس موومنٹ کی درخواست بھی جمع نہیں کروائی گئی جس پر شدید تشویش کا اظہار کیا گیا ہے، ایف بی آر نے ہدایت دی ہے کہ تمام متعلقہ کیریئرز اور ایجنٹس فوری طور پر ان کنٹینرز کو متعلقہ کراچی پورٹ ٹرمینلز پر واپس منتقل کریں اور اس عمل کو ترجیحی بنیادوں پر مکمل کیا جائے جبکہ تمام کسٹمز قوانین اور ریگولیٹری فریم ورک پر سختی سے عملدرآمد یقینی بنایا جائے، مزید خبردار کیا گیا ہے کہ ان احکامات کی عدم تعمیل کی صورت میں کسٹمز رولز 2001کی شق329 اور کسٹمز ایکٹ1969 کے تحت متعلقہ بانڈڈ کیریئرز کے خلاف سخت قانونی و تادیبی کارروائی عمل میں لائی جائے گی، ایف بی آر نے اس معاملے کو انتہائی ہنگامی قرار دیتے ہوئے فوری عملدرآمد یقینی بنانے کی ہدایت جاری کر دی ہے۔
