پری ارائیول کلیئرنس نظام میں بڑی اصلاحات کا فیصلہ

کراچی(کسٹم بلیٹن) ملک میں درآمدی تجارت کو تیز، شفاف اور مو ثر بنانے کیلئے قبل از آمد کلیئرنس نظام میں اہم اصلاحات لانے کا فیصلہ کرلیا گیا۔ اس سلسلے میں چیف کلکٹر آف کسٹمز واجد علی کی زیر صدارت کراچی میں ایک اہم اعلیٰ سطحی اجلاس منعقد ہوا، جس میں کلکٹر کسٹمز نیئر شفیق، افنان خان،پاکستان شپنگ ایجنٹس ایسوسی ایشن کے چیئرمین محمد راجپر، کسٹمز حکام، شپنگ کمپنیوں کے نمائندوں، تجارتی تنظیموں اور کلیئرنگ ایجنٹس نے شرکت کی۔اجلاس میں پری ارائیول کلیئرنس نظام کے تحت درپیش انتظامی مسائل،معائنہ کےلئے منتخب کنٹینرزکی منتقلی اور بندرگاہوں پر بڑھتے دباو¿ جیسے اہم معاملات پر تفصیلی غور کیا گیا۔ شرکاءنے اس بات پر اتفاق کیا کہ بندرگاہوں پر بڑھتے ہوئے رش، کلیئرنس میں تاخیر اور کاروباری لاگت میں اضافے کو کم کرنے کیلئے فوری اور مربوط اقدامات ناگزیر ہیں۔اس موقع پر کراچی کسٹم ایجنٹس ایسوسی ایشن کے جنرل سیکرٹری وقاص انجم نے اجلاس کی تفصیلات بتاتے ہوئے کہا کہ پری ارایول کلیئرنس نظام کو جدید تقاضوں کے مطابق مزید فعال بنانے کیلئے متعدد اہم فیصلے کیے گئے ہیں، جن سے نہ صرف بندرگاہی کارروائیاں بہتر ہوں گی بلکہ درآمدی تجارت کو بھی نمایاں سہولت حاصل ہوگی۔اجلاس میں سب سے اہم معاملہ کنسائمنٹس کی فہرست کو بروقت جمع کروانے کاہے۔ کراچی کسٹم ایجنٹس ایسوسی ایشن کے وفد نے شپنگ کمپنیوں کے نمائندوں سے مطالبہ کیا کہ پری ارائیول کلیئرنس نظام کے تحت کنسائمنٹس فہرست مقررہ وقت پر جمع کرائی جائے تاکہ کلیئرنس کے عمل میں غیر ضروری تاخیر ختم ہو سکے۔ اس موقع پر محمد راجپر نے یقین دہانی کرائی کہ متعلقہ کمپنیوں کی کارکردگی بہتر بنانے اور قواعد پر عملدرآمد یقینی بنانے کیلئے ضروری ہدایات جاری کی جائیں گی۔اجلاس میں یہ بھی طے پایا کہ مستقبل میں اگرپری ارائیول کلیئرنس نظام کے حوالے سے کسی نئے ضابطے، طریقہ کار یا عملی رہنمائی کی ضرورت پیش آئی تو کسٹمز حکام، شپنگ کمپنیوں اور کلیئرنگ ایجنٹس کی مشاورت سے متفقہ اور مربوط نظام تشکیل دیا جائے گا تاکہ تمام متعلقہ فریقوں کو یکساں سہولت میسر آسکے جبکہ جانچ پڑتال کیلئے منتخب کنٹینرز کے بارے میں اہم فیصلہ کرتے ہوئے شرکاءنے اتفاق کیا کہ پری ارائیول کے گوشواروں میں شامل ایسے کنٹینرز کو ڈھیر میں رکھنے کے بجائے جہاز سے اترتے ہی فوری طور پر جانچ پڑتال کے عمل سے گزارا جائے گا، جس کے بعد انہیں مقررہ مقام پر منتقل کیا جائے گا تاکہ تاخیر ختم ہو اور بندرگاہوں پر کنٹینرز کا دباو¿ کم کیا جا سکے۔ اس مقصد کیلئے تمام متعلقہ ٹرمینلز کو واضح ہدایات جاری کرنے پر بھی اتفاق کیا گیا۔اسی طرح معائنہ یا خصوصی جانچ کیلئے منتخب کنٹینرز کے حوالے سے فیصلہ کیا گیا کہ انہیں براہ راست جانچ پڑتال کی جگہ منتقل کیا جائے گا تاکہ اضافی نقل و حرکت، وقت کے ضائع اور انتظامی پیچیدگیوں سے بچا جا سکے۔ تجارتی حلقوں نے اس فیصلے کو انتہائی مثبت پیش رفت قرار دیا ہے۔اجلاس کے شرکاءنے اس بات پر اتفاق کیا کہ اگر قبل از آمد گوشوارے میں ترمیم، سامان کی کمی یا کسی فنی خرابی کی صورتحال پیدا ہو تو گوشوارہ منسوخ کرنے کیلئے فوری اور واضح مدت مقرر کی جائے تاکہ تاجروں، درآمد کنندگان اور کلیئرنگ ایجنٹس کو غیر ضروری مشکلات کا سامنا نہ کرنا پڑے۔ اجلاس میں اس امر پر زور دیا گیا کہ اس مرحلے پر ڈیوٹی اور ٹیکس لاگو نہیں ہوتے، اس لیے تاخیر کا کوئی جواز نہیں ہونا چاہیے۔اس موقع پرکراچی کسٹمزایجنٹس ایسوسی ایشن کے صدر یحییٰ محمد، سینئر نائب صدر طارق رشید خان، جوائنٹ سیکرٹری دانش ریاض سمیت مختلف تجارتی اور شپنگ تنظیموں کے نمائندوں نے بھی شرکت کی اور عملی تجاویز پیش کیں۔