ایف بی آرنے کراچی میں نئے آف ڈاک ٹرمینل کی منظوری دے دی

کراچی(کسٹم بلیٹن )وفاقی بورڈ آف ریونیو (ایف بی آر) نے کراچی میں قائم میسرزانٹرنیشنل کارگوٹرمینل پاکستان پرائیوٹ لمیٹڈکوکو باضابطہ طور پر آف ڈاک ٹرمینل اور کسٹمز پورٹ قرار دیتے ہوئے اس کے قیام کی منظوری دے دی ہے۔ اس حوالے سے ایس آراو914جاری کر دیا گیا ہے، جس کے تحت ٹرمینل کو کراچی پورٹ اور پورٹ محمد بن قاسم کے ذریعے درآمد اور برآمد ہونے والے کنٹینرز اور دیگر کارگو کی کلیئرنس کی اجازت حاصل ہوگی۔نوٹیفکیشن کے مطابق یہ اقدام کسٹمز ایکٹ 1969 کی دفعہ9 اور دفعہ10 کے تحت حاصل اختیارات استعمال کرتے ہوئے کیا گیا ہے۔ نیا آف ڈاک ٹرمینل کراچی کے علاقے ٹرانس لیاری، ہاکس بے میں واقع ہے جو20 ایکڑ اراضی پر محیط ہے۔ اس سہولت کے قیام سے بندرگاہوں پر بڑھتے ہوئے کارگو دباﺅ کو کم کرنے اور تجارتی سرگرمیوں کو مزید موثر بنانے میں مدد ملے گی۔ایف بی آر کے نوٹیفکیشن کے مطابق مذکورہ ٹرمینل پرایف سی ایل اورایل سی ایل دونوں اقسام کے درآمدی و برآمدی کارگو کی کلیئرنس کی جا سکے گی۔ اس اقدام سے درآمد کنندوبرآمد کنندگان، شپنگ لائنز،کلیئرنگ ایجنٹس اور لاجسٹکس کمپنیوں کو اضافی سہولت میسر آئے گی جبکہ کراچی پورٹ اور پورٹ قاسم پر کنٹینرز کے بڑھتے ہوئے رش کو بھی کم کرنے میں مدد ملے گی۔ایف بی آر نے واضح کیا ہے کہ ٹرمینل پر کارگو آپریشنز کا باقاعدہ آغاز اس وقت تک نہیں ہو سکے گا جب تک کسٹمز رولز 2001 کی شق544کے تحت مقرر تمام قانونی، تکنیکی اور آپریشنل تقاضے مکمل نہیں کر لیے جاتے۔ ان تمام شرائط کی تکمیل کے بعدکلکٹریٹ آف کسٹمز اپریزمنٹ ویسٹ کراچی، کلکٹریٹ آف کسٹمز ایکسپورٹس کراچی کے ساتھ مشاورت سے اسٹینڈنگ آرڈرز جاری کرے گا، جن کے تحت ٹرمینل پر درآمدی اور برآمدی کارگو آپریشنز کا آغاز کیا جائے گا۔