کراچی انٹرنیشنل کنٹینرزٹرمینل کی ڈیجیٹل تبدیلی اور آپریشنل بہتری کے اقدامات
کراچی(کسٹم بلیٹن) کراچی انٹرنیشنل کنٹینر ٹرمینل نے بندرگاہی آپریشنز کو جدید خطوط پر استوار کرنے، سیکیورٹی کے نظام کو مزید مضبوط بنانے اور صارفین کو جدید سہولیات کی فراہمی کے لیے متعدد اہم تکنیکی اور آپریشنل اقدامات متعارف کرا دیے ہیں۔ یہ اقدامات ٹرمینل کی وسیع تر ڈیجیٹلائزیشن حکمت عملی کا حصہ ہیں، جن کا مقصد بندرگاہی کارکردگی میں اضافہ، تجارتی سرگرمیوں کو سہولت فراہم کرنا اور عالمی معیار کی لاجسٹک خدمات مہیا کرنا ہے۔تفصیلات کے مطابق کراچی انٹرنیشنل کنٹینرزٹرمینل نے ٹرمینل میں داخل ہونے والے تمام ڈرائیوروں کے لیے لازمی بایومیٹرک تصدیقی نظام مکمل طور پر نافذ کر دیا ہے اور سو فیصد رجسٹریشن کا ہدف حاصل کر لیا گیا ہے۔ اس نظام کے تحت ہر ڈرائیور کی شناخت بایومیٹرک تصدیق کے ذریعے کی جاتی ہے، جس سے غیر مجاز افراد کی رسائی روکنے، سیکیورٹی خطرات کم کرنے اور ٹرمینل میں داخلے اور اخراج کا مکمل ریکارڈ محفوظ رکھنے میں مدد ملے گی۔ بندرگاہی شعبے کے ماہرین کا کہنا ہے کہ یہ اقدام گیٹ آپریشنز کی ڈیجیٹلائزیشن اور سیکیورٹی نظام کی بہتری کی جانب ایک اہم پیش رفت ہے۔کراچی انٹرنیشنل کنٹینرزٹرمینل نے صارفین کی سہولت کے لیے مربوط آن لائن انوائس جنریشن اور ڈیجیٹل ادائیگیوں کا جدید نظام بھی متعارف کرا دیا ہے۔ اس پلیٹ فارم کے ذریعے شپنگ ایجنٹس، درآمد کنندگان اور دیگر اسٹیک ہولڈرز اب الیکٹرانک طریقے سے انوائس تیار کرنے اور آن لائن ادائیگیاں کرنے کے قابل ہوں گے۔ اس اقدام سے نہ صرف کاغذی کارروائی میں نمایاں کمی آئے گی بلکہ ادائیگیوں کے عمل میں شفافیت، رفتار اور سہولت بھی پیدا ہوگی۔ ماہرین کے مطابق ڈیجیٹل مالیاتی نظام سے کاروباری لاگت میں کمی اور خدمات کی فراہمی میں بہتری متوقع ہے۔بڑھتے ہوئے کارگو حجم اور یارڈ پر دباو¿ کے پیش نظر ٹرمینل نے یارڈ آپٹیمائزیشن کے لیے بھی اہم اقدامات کیے ہیں۔ پاکستان کسٹمز کے ساتھ قریبی رابطے اور تعاون کے تحت طویل عرصے سے موجود غیر فعال کنٹینرز کو کسٹمز بانڈڈ آف ڈاک ٹرمینلز منتقل کیا گیا ہے، جس کے نتیجے میں فعال کارگو آپریشنز کے لیے اضافی جگہ دستیاب ہوئی ہے۔ اس اقدام سے کنٹینرز کی نقل و حرکت میں بہتری، بھیڑ میں کمی اور کارگو ہینڈلنگ کے عمل کو مزید مو¿ثر بنانے میں مدد ملے گی۔شپنگ کی صنعت سے وابستہ ماہرین کا کہنا ہے کہ موجودہ عالمی تجارتی ماحول میں موثر یارڈ مینجمنٹ اور جدید ٹیکنالوجی کا استعمال نہایت اہمیت اختیار کر چکا ہے۔ بڑھتی ہوئی عالمی تجارت، سپلائی چین کے بدلتے تقاضوں اور کارگو ٹریفک میں اضافے کے باعث بندرگاہوں پر دباو¿ بڑھ رہا ہے، جس سے نمٹنے کے لیے ڈیجیٹل اور خودکار نظام ناگزیر بن چکے ہیں۔کر اچی انٹرنیشنل کنٹینرزٹرمینل نے یہ اقدامات محفوظ، جدید اور مو¿ثر بندرگاہی ماحول کے قیام کے عزم کا اظہار ہیں۔ ٹرمینل کا کہنا ہے کہ ٹیکنالوجی پر مبنی سرمایہ کاری نہ صرف خدمات کے معیار کو بہتر بناتی ہے بلکہ قومی تجارتی اور لاجسٹک انفراسٹرکچر کو بھی مضبوط بنانے میں اہم کردار ادا کرتی ہے۔عالمی سطح پر ٹرمینل آپریٹرز تیزی سے آٹومیشن، ڈیجیٹلائزیشن اور اسمارٹ لاجسٹکس کی جانب بڑھ رہے ہیں تاکہ صارفین کی بدلتی ضروریات اور سپلائی چین کے بڑھتے ہوئے تقاضوں کو پورا کیا جا سکے۔ پاکستان کے نمایاں کنٹینر ٹرمینلز میں شمار ہونے والاکراچی انٹرنیشنل کنٹینرزٹرمینل بھی جدید ٹیکنالوجی کے استعمال کے ذریعے بین الاقوامی تجارت میں سہولت فراہم کرنے اور بندرگاہی آپریشنز کی مجموعی کارکردگی بہتر بنانے کے لیے اپنی صلاحیتوں میں مسلسل اضافہ کر رہا ہے۔صنعتی و تجارتی حلقوں کا کہنا ہے کہ ڈیجیٹل نظام، بہتر سیکیورٹی، جدید انفراسٹرکچر اور مو¿ثر یارڈ مینجمنٹ میں مسلسل سرمایہ کاری پاکستان کی بندرگاہوں کی مسابقتی صلاحیت بڑھانے اور ملک کو ایک موثر علاقائی لاجسٹک اور ٹرانس شپمنٹ حب بنانے میں کلیدی کردار ادا کر سکتی ہے۔
