برآمدات میں اضافے کے لیے وفاقی حکومت کا بڑا فیصلہ، ایکسپورٹرز کے لیے سپر ٹیکس ختم

اسلام آباد (کسٹم بلیٹن) وفاقی حکومت اور فیڈرل بورڈ آف ریونیو نے ملک سے برآمدات کو فروغ دینے اور ایکسپورٹ انڈسٹری کو ریلیف فراہم کرنے کے لیے ایک بڑا اور اہم فیصلہ کرتے ہوئے ایکسپورٹرز پر لاگو سپر ٹیکس ختم کرنے کا نوٹیفکیشن جاری کر دیا ہے۔ایف بی آر کی جانب سے جاری کردہ وضاحت کے مطابق انکم ٹیکس آرڈیننس کے سیکنڈ شیڈول کے پارٹIV میں نئی شق”104B”شامل کر دی گئی ہے، جس کے تحت مخصوص شرائط پوری کرنے والے برآمد کنندگان کو سپر ٹیکس سے استثنیٰ حاصل ہو گا۔ نوٹیفکیشن کے مطابق سپر ٹیکس سے مکمل چھوٹ حاصل کرنے کے لیے ایکسپورٹر کی کل سالانہ آمدن کا 80 فیصد سے زائد حصہ برآمدات سے حاصل شدہ ہونا لازمی ہوگا۔ ایف بی آر کے مطابق ایکسپورٹرز کو سپر ٹیکس سے اس چھوٹ کا عملی فائدہ مالی سال2027سے ملنا شروع ہو گا۔ نوٹیفکیشن کی رو سے 500 ملین (50 کروڑ) روپے سے زائد آمدن والے ایکسپورٹرز، جو 80 فیصد برآمدی شرط پوری کریں گے، وہ سپر ٹیکس کی تمام تر ادائیگیوں سے مکمل مستثنیٰ ہوں گے۔ نوٹیفکیشن کے مطابق500 ملین (50 کروڑ) روپے تک آمدن والے تمام عام ٹیکس دہندگان کے لیے سپر ٹیکس ختم کردیا گیا ہے جس میںبینکنگ، فرٹیلائزر اور دیگر مخصوص شعبوں شامل نہیں ہیں، نوٹیفکیشن میں کہاگیاہے کہ 500 ملین روپے سے زائد آمدن رکھنے والے عام افراد اور کمپنیوں کے لیے سپر ٹیکس کی شرح 10 فیصد سے گھٹا کر 8 فیصد کر دی گئی ہے جبکہ بینکنگ، فرٹیلائزر اور تیل و گیس کی تلاش سے متعلقہ شعبوں جن کی سالانہ آمدن 150 ملین روپے سے زائد ہوگی ان پر 10 فیصد سپر ٹیکس برقرار رہے گا۔نوٹیفکیشن میں مزید بتایا گیا ہے کہ غیر منقولہ جائیداد کی خریدو فروخت پر ایڈوانس ٹیکس2.75فیصد اور1.25 فیصد مقرر کر دیا گیا ہے۔ اس کے علاوہ بین الاقوامی کریڈٹ و ڈیبٹ کارڈز کے استعمال پر ایڈوانس ٹیکس 5 فیصد سے کم کر کے0.5فیصد کر دیا گیا ہے۔