بیگیج کی آڑ میں کروڑوں روپے کے تجارتی سامان کی اسمگلنگ اور ٹیکس چوری کی کوشش ،مقدمہ درج
کراچی(کسٹم بلیٹن)بیگیج اسکیم کے تحت درآمدکئے جانے والے کنسائمنٹ کی آڑمیں کروڑوں روپے مالیت کے تجارتی سامان کی اسمگلنگ اورٹیکس چوری کی کوشش کو کلکٹریٹ اپریزمنٹ ایسٹ کے آراینڈڈی سیکشن نے کلیئرنگ ایجنٹ میسرزبی ایچ ایف سروسزانٹرنیشنل کے پروپرائیٹر سید مکرم علی ،مسافرحمزہ مرادکے خلاف مقدمہ درج کرکے قانونی کارروائی کا آغازکردیاگیاہے جبکہ ٹیکس چوری کرنے اورتجارتی سامان کی کلیئرنس میں سہولت کارکا کرداراداکرکے والے کسٹمزآفیسرکو معطل کردیاگیاہے۔ذرائع کے مطابق اپریزمنٹ ایسٹ نے آراینڈڈی سیکشن کو باوثوق اطلاع ملی تھی کہ کچھ عناصر بیرون ملک سے آنے والے مسافروں کے لیے مخصوص پرسنل بیگیج سہولت کا ناجائز فائدہ اٹھا کر بھاری مقدارمیں قیمتی سامان کسٹمز ڈیوٹی ادا کیے بغیر کلیئر کرانے میں ملوث ہیں۔ اس اطلاع پر سخت نگرانی کے بعد کنٹینرکی تفصیلی جانچ کے لیے منتخب کیا گیا، جس میں کسٹمزآفیسرکی جانب سے ابتدائی اسیسمنٹ میں محض تین لاکھ روپے کے ڈیوٹی وٹیکسزکی ادائیگی پر کنسائمنٹ ریلیز کیا گیا تھا۔ شک کی بنیاد پر کنٹینر کی دوبارہ تفصیلی معائنے کے دوران یہ انکشاف ہوا کہ ابتدائی رپورٹ میں ظاہر کردہ استعمال شدہ اشیاءکے علاوہ بھاری مقدار میں غیر ظاہر شدہ تجارتی سامان چھپایا گیا تھا۔جس میں ایو ڈی ٹوائلٹ برانڈد پرفیوم، کپڑا، ٹرائیڈنٹ ببل گم ،کارپٹ، کمبل، ڈنر سیٹ، کیبل وائر، ڈائپر، واٹر ٹینک، ایلومینیم کی سیڑھی، بچوں کی گاڑیاں، بی بی اسٹرولر، بلینڈر و چاپر، کافی میکر، الیکٹرک کیٹل، نان گیئر اور گیئر سائیکلیں، ہینڈ بیگز، مائیکرو ویو اوون ، سینڈوچ میکر ، سلائیڈنگ اور سپرے گن، ویکیوم کلینر، ڈبل انفراریڈ کک ٹاپ ، ہیر اسٹائلر، ڈشز، کراکری،میڈیکل کا سامان اور دیگر گھریلو استعمال کا سامان برآمدہواجس کی مالیت ایک کروڑ13لاکھ83ہزارروپے بتائی گئی ہے اوراس پر ایک کروڑ20لاکھ روپے کے ڈیوٹی وٹیکسزعائدکئے گئے ہیں لیکن معطل کئے جانےو الے کسٹمزآفیسرنے مذکورہ کنسائمنٹ صرف تین لاکھ روپے کے ڈیوٹی وٹیکسزکی ادائیگی پر کلیئرکرنے کے احکامات جاری کئے ۔ذرائع کے مطابق پرسنل بیگیج میں بھاری مقدارمیں تجارتی سامان کی اسمگلنگ کاکام عرصہ درازسے چل رہاتھاجس میں ماہانہ تین سوسے زائد کنٹینرکے کلیئرنس کی جارہی تھی تاہم کارروائی کے بعد اپریزمنٹ ایسٹ سے بیگیج کی کلیئرنس 30کنٹینرزپر آگئی ہے ۔
