ان لینڈریونیونے غیرقانونی طورپر بینک اکاﺅنٹ منجمدکرکے رقم وصول کی ،ایف بی آر کے افسران بدانتظامی کے مرتکب قرار، ایف ٹی او کا تاریخی فیصلہ
کراچی(کسٹم بلیٹن)فیڈرل ٹیکس محتسب (ایف ٹی او) نے فیڈرل بورڈ آف ریونیو(ایف بی آر)، بالخصوص کمشنر ان لینڈ ریونیو، ریفنڈ زون، آر ٹی اوٹو کراچی اور متعلقہ افسران کے خلاف ایک اہم اور فیصلہ کن حکم جاری کرتے ہوئے انہیں بدانتظامی کا مرتکب قرار دے دیا ہے۔ یہ فیصلہ درخواست دہندہ میسرزاسکائی ہواک کی جانب سے ٹیکس سال 2014 کے معاملے پر دائر شکایت پر سنایا گیا۔درخواست دہندہ میسرزاسکائی ہواک نے ایف ٹی او میں دائر شکایت میں نشاندہی کی کہ محکمہ ان لینڈ ریونیو نے انکم ٹیکس آرڈیننس 2001 کے تحت 27 اگست 2018 کو سیکشن 122 کے تحت ایک کروڑ 91 لاکھ روپے سے زائد کا ٹیکس ڈیمانڈ قائم کیا اور بینک اکاﺅنٹ منجمد کر کے 52 لاکھ روپے سے زائد رقم زبردستی وصول کر لی۔بعد ازاں، متاثرہ ٹیکس دہندہ نے کمشنر ان لینڈ ریونیو (اپیلز-V)، کراچی سے رجوع کیا، جنہوں نے 12 فروری 2019 کو آرڈر اِن اپیل نمبر 22 کے ذریعے اس اسیسمنٹ آرڈر کو کالعدم قرار دیتے ہوئے محکمہ کو واضح ہدایت دی کہ قانونی تقاضوں کے مطابق دوبارہ کارروائی کی جائے۔تاہم، ایف ٹی او کے فیصلے میں کہا گیا ہے کہ محکمہ ان لینڈ ریونیو نے نہ صرف اپیلیٹ احکامات کو نظرانداز کیا بلکہ چھ سال سے زائد عرصہ تک اپیل ایفیکٹ جاری نہیں کیا۔ بالآخر 24 نومبر 2025 کو اپیل ایفیکٹ جاری کیا گیا، مگر اس میں بھی بینک اٹیچمنٹ کے ذریعے وصول کی گئی رقم کا کریڈٹ شامل نہیں کیا گیا، جس کے باعث درخواست دہندہ کو اس کا قانونی ریفنڈ نہ مل سکا۔فیڈرل ٹیکس محتسب نے فیصلے میں اس امر پر بھی شدید برہمی کا اظہار کیا کہ محکمہ کے نمائندگان 28 نومبر، 5 دسمبر اور 12 دسمبر 2025 کو ہونے والی سماعتوں میں پیش نہیں ہوئے اور نہ ہی کوئی تحریری مو¿قف جمع کروایا، جس سے محکمہ کی غفلت اور غیر سنجیدگی مزید واضح ہو گئی۔ایف ٹی او کے مطابق، اتنی طویل تاخیر، اپیلیٹ احکامات پر عملدرآمد میں ناکامی اور ٹیکس دہندہ کو مالی و ذہنی اذیت میں مبتلا کرنا واضح طور پر بدانتظامی کے زمرے میں آتا ہے، جو قانوناً ناقابل قبول ہے۔جس پرایف ٹی او کی سخت سفارشات فیڈرل ٹیکس محتسب نے ایف بی آر کو ہدایت کی ہے کہ چیف کمشنر آر ٹی او-II کراچی چھ سالہ غیرقانونی تاخیر اور غفلت کے ذمہ دار افسران کا تعین کریںاورایف ٹی او کی مسلسل سماعتوں میں عدم حاضری پر محکمانہ کارروائی کی جائے،جبکہ کمشنر ان لینڈ ریونیو، زون-III اپیل ایفیکٹ کو فوری طور پر درست کرتے ہوئے زبردستی وصول شدہ رقم کا مکمل کریڈٹ دیں،کمشنر ریفنڈ زون، آر ٹی او-II ٹیکس سال 2014 کا ریفنڈ بلا تاخیر اور قانون کے مطابق نمٹائیں اور45 دن کے اندر مکمل عملدرآمد رپورٹ پیش کی جائے۔
