پاکستان کسٹمز نے شپنگ انڈسٹری کے لئے سرکاری بنک ایکسچینج ریٹس کے مطابق شپنگ چارجز نافذ کردیئے
کراچی (کسٹم بلیٹن )پاکستان کسٹمز نے ایک تاریخی کامیابی حاصل کرتے ہوئے شپنگ انڈسٹری کے لئے سرکاری بینک کی شرح مبادلہ کے مطابق شپنگ چارجز نافذ کردیئے ہیں۔ جس کے نتیجے میں بین الاقوامی شپنگ لائنزکی جانب سے من مانی اور حد سے زیادہ بلنگ کی پریکٹس کا خاتمہ ہو گیا ہے۔ آل پاکستان شپنگ ایسوسی ایشن نے 12 جنوری 2026 کو تحریری طور پر باضابطہ تصدیق کی ہے کہ اس کی تمام رکن شپنگ لائنز اب اسٹیٹ بینک آف پاکستان کے ضوابط کے مطابق اپنے متعلقہ مجاز کمرشل بینکوں کی جانب سے فراہم کردہ شرح مبادلہ کی بنیاد پر ہی شپنگ فیس وصول کر رہی ہیں۔ یہ پیش رفت پاکستان کسٹمز کی جانب سے قائم کردہ ایک اعلیٰ سطحی کمیٹی کی مسلسل کاوشوں کا نتیجہ ہے جس نے شپنگ ایجنٹس، ٹرمینل آپریٹرز، تجارتی تنظیموں اور بین الاقوامی شپنگ لائنز کے ساتھ تفصیلی مشاورت کی۔ ایک اہم سنگِ میل کے طور پر پاکستان میں کام کرنے والی سب سے بڑی شپنگ لائن ، مارسک جوکہ ملک کا تقریباً 26 فیصد مجموعی کارگو ہینڈل کرتی ہے، نے پہلے ہی سے سرکاری بینک کی شرح مبادلہ کا اطلاق شروع کر دیا ہے جس سےجہاز رانی کی پوری صنعت کے لیے ایک معیار قائم ہوا ہے۔ بڑی بین الاقوامی شپنگ لائنز اور ان کے مقامی ایجنٹس کی متعددکمپنیوں کی جانب سے تحریری طور پر کمپلائنس کی تصدیق موصول ہو چکی ہے جس میں بتایا گیا ہے کہ جہاز رانی کی پوری صنعت میں سٹیٹ بینک آف پاکستان کی شرح مبادلہ پر مکمل عمل درآمد کیا جا رہا ہے۔توقع ہے کہ اس اقدام سے تاجروں اور برآمد کنندگان پر لاگت کے دباو¿ میں خاطر خواہ کمی آئے گی، شپنگ چارجزمیں شفافیت ہوگی اور کاروباری برادری کا اعتماد بحال ہوگا۔
