ہمدرد چیک پوسٹ پر اسمگلرز کے تعاقب میں کسٹمزکی گاڑی تباہ، چار سپاہی زخمی
کراچی:(کسٹم بلیٹن) ہمدرد چیک پوسٹ پر اسمگلرز کے خلاف کارروائی کے دوران کسٹمز انفورسمنٹ کی گاڑی حادثے کا شکار ہو گئی جس کے نتیجے میں گاڑی مکمل طور پر تباہ ہو گئی جبکہ اس میں سوار چاروں سپاہی زخمی ہو گئے۔ حادثے نے فیلڈ آپریشنز کے دوران حفاظتی اقدامات اور افسران کی موجودگی سے متعلق سوالات کو جنم دے دیا ہے۔ذرائع کے مطابق حادثے کے وقت گاڑی میں ڈرائیور سمیت چار سپاہی موجود تھے تاہم کوئی افسر ہمراہ نہیں تھا، جبکہ قواعد کے مطابق مصدقہ اطلاع پر کارروائی کے دوران افسر کی موجودگی ضروری سمجھی جاتی ہے۔ بتایا جاتا ہے کہ حالیہ عرصے میں اسمگلنگ کے خلاف کارروائیوں میں کمی پر اعلیٰ افسران کی جانب سے دباﺅ بڑھایا گیا تھا اور ہمدرد چیک پوسٹ پر کارکردگی بہتر بنانے کے لیے تبادلوں کا سلسلہ بھی جاری رہا۔حادثے میں زخمی ہونے والے سپاہیوں ، عدیل احمد،ذیشان رازی، صادق عدیل، منصور عباسی شامل ہیں۔اطلاعات کے مطابق سپاہی عدیل احمد اور سپاہی صادق عدیل کو طبی امداد کے بعد اسپتال سے ڈسچارج کر دیا گیا ہے۔ سپاہی منصور عباسی حادثے میں محفوظ رہے، جبکہ سپاہی ذیشان رازی شدید زخمی حالت میں ساﺅتھ سٹی اسپتال منتقل کیے گئے جہاں وہ زیر علاج ہیں اور ان کی حالت تشویشناک بتائی جاتی ہے۔ذرائع کا کہنا ہے کہ ہمدرد چیک پوسٹ پر چھالیہ اور ڈیزل کی اسمگلنگ میں اضافے کے باعث کسٹمز انفورسمنٹ کی کارکردگی پر اعلیٰ حکام کی تشویش میں اضافہ ہوا تھا۔تجارتی حلقوں نے مطالبہ کیا ہے کہ واقعے کی شفاف اور غیرجانبدارانہ تحقیقات کرائی جائیں، ذمہ داری کا تعین کیا جائے اور آئندہ فیلڈ آپریشنز کے دوران قانونی تقاضوں اور حفاظتی اصولوں پر سختی سے عمل درآمد یقینی بنایا جائے تاکہ اہلکاروں کی جان و مال کا تحفظ ممکن بنایا جا سکے۔
