سوشل میڈیا آمدن کو ٹیکس نیٹ میں شامل کرنے کے لئے جامع نظام متعارف

اسلام آباد(کسٹم بلیٹن) فیڈرل بورڈ آف ریونیو نے انکم ٹیکس رولز 2002 میں اہم مجوزہ ترامیم متعارف کرا دی ہیں جن کے تحت سوشل میڈیا پلیٹ فارمز کے ذریعے آمدن حاصل کرنے والے رہائشی افراد کو باقاعدہ ٹیکس نیٹ میں شامل کیا جائے گا، نئے قواعد کے مطابق ہر وہ شخص جو یوٹیوب، فیس بک، ٹک ٹاک یا دیگر پلیٹ فارمز کے ذریعے صارفین کے ساتھ تعامل کے نتیجے میں آمدن حاصل کرتا ہے اس پر خصوصی ٹیکس طریقہ کار لاگو ہوگا، آمدن کا تعین دو طریقوں سے کیا جائے گا جس میں یا تو اصل کمائی کو مدنظر رکھا جائے گا یا پھر ریونیو پر مل (آرپی ایم)، ویوز کی اوسط تعداد اور پوسٹس کی تعداد کی بنیاد پر حساب لگایا جائے گا، یوٹیوب کیلئے فی ہزار ویوز آمدن 195 روپے مقرر کی گئی ہے جو وقتاً فوقتاً تبدیل کی جا سکتی ہے، اخراجات کی زیادہ سے زیادہ حد 30 فیصد رکھی گئی ہے تاکہ مصنوعی طور پر منافع کم ظاہر نہ کیا جا سکے، قواعد کے تحت متعلقہ افراد کو سہ ماہی بنیادوں پر ایڈوانس ٹیکس ادا کرنا ہوگا جبکہ سالانہ ریٹرن میں اس آمدن کیلئے علیحدہ حصہ مختص کیا جائے گا، اگر کوئی ٹیکس دہندہ اپنی آمدن کم ظاہر کرے گا تو متعلقہ کمشنر کو اختیار ہوگا کہ وہ درستگی کرتے ہوئے واجب الادا ٹیکس وصول کرے، ایف بی آر نے اس مجوزہ نظام پر سات دن کے اندر اعتراضات اور تجاویز طلب کی ہیں جس کے بعد اسے حتمی شکل دی جائے گی، ماہرین کے مطابق یہ اقدام ڈیجیٹل معیشت کو ریگولیٹ کرنے کی جانب اہم پیش رفت ہے۔