غیر ملکی سوشل میڈیا پلیٹ فارمز بھی ٹیکس نیٹ میں، پاکستان نے ڈیجیٹل معیشت پر گرفت مضبوط کرنے کا فیصلہ

اسلام آباد(کسٹم بلیٹن) فیڈرل بورڈ آف ریونیو نے انکم ٹیکس رولز میں مزید مجوزہ ترامیم کے ذریعے غیر مقیم افراد اور غیر ملکی سوشل میڈیا پلیٹ فارمز کو بھی پاکستانی ٹیکس دائرہ کار میں شامل کرنے کی تیاری مکمل کر لی ہے، نئے قواعد کے تحت وہ غیر ملکی افراد یا کمپنیاں جو پاکستان میں ڈیجیٹل ذرائع سے کاروباری سرگرمیاں جاری رکھتی ہیں اور صارفین کے ساتھ مسلسل تعامل میں رہتی ہیں انہیں ٹیکس کے دائرے میں لایا جائے گا، اس کیلئے ایک واضح حد مقرر کی گئی ہے جس کے مطابق اگر کسی پلیٹ فارم یا فرد کے پاکستان میں سالانہ 50 ہزار سے زائد یا سہ ماہی 12 ہزار 250 سے زائد صارفین ہوں تو اسے پاکستان میں قابل ٹیکس تصور کیا جائے گا، آمدن کا تعین اسی فارمولے کے تحت کیا جائے گا جو مقامی افراد کیلئے مقرر کیا گیا ہے جس میں اصل آمدن یا ویوز کی بنیاد پر حساب شامل ہوگا جبکہ اخراجات کی حد 30 فیصد تک محدود ہوگی، ایسے افراد کیلئے ایڈوانس ٹیکس کی ادائیگی، سالانہ گوشوارے میں آمدن کا اندراج اور دیگر قانونی تقاضے لازمی ہوں گے، اگر کوئی غیر ملکی ادارہ اپنی آمدن کم ظاہر کرے گا تو متعلقہ حکام کو اسے درست کرنے اور ٹیکس وصول کرنے کا مکمل اختیار حاصل ہوگا، ایف بی آر نے اس مسودے پر بھی سات دن کے اندر اعتراضات طلب کیے ہیں، ماہرین کا کہنا ہے کہ یہ اقدام پاکستان میں تیزی سے بڑھتی ہوئی ڈیجیٹل معیشت کو ٹیکس نیٹ میں لانے اور محصولات میں اضافہ کرنے کیلئے نہایت اہم پیش رفت ہے۔