ضبط شدہ سامان کی نیلامی کے نئے قواعد نافذ

کراچی (کسٹم بلیٹن) کلکٹریٹ آف کسٹمز انفورسمنٹ کراچی نے ضبط شدہ سامان اور گاڑیوں کی نیلامی کے نظام کو مزید شفاف، مو¿ثر اور تنازعات سے پاک بنانے کے لیے اہم انتظامی اقدام اٹھاتے ہوئے کامیاب بٹر کے لیے رقم جمع کرانے سے قبل نیلام شدہ مال کے معائنہ کو لازمی قرار دے دیا گیا ہے۔ محکمہ کسٹمز کی جانب سے جاری کیے گئے سرکلر کے مطابق یہ فیصلہ نیلامی کے بعد سامنے آنے والی شکایات اور تنازعات کے خاتمے کے لیے کیا گیا ہے تاکہ خریدار ادائیگی سے قبل اپنے خریدے گئے مال کا خود معائنہ کر سکیں۔ سرکلر میں کہا گیا ہے کہ ماضی میں متعدد مواقع پر کامیاب بولی دہندگان نے نیلامی کی رقم جمع کرانے اور ڈلیوری آرڈر حاصل کرنے کے بعد اسٹیٹ ویئر ہاو¿سز سے سامان وصول کرتے وقت مال کی حالت، مقدار، دستیابی یا شناخت کے حوالے سے اعتراضات اور شکایات درج کرائیں، جس کے باعث انتظامی مشکلات اور قانونی تنازعات پیدا ہوئے۔ ان مسائل کے مستقل حل کے لیے نیا طریقہ کار فوری طور پر نافذ کر دیا گیا ہے۔ نئے طریقہ کار کے تحت نیلامی مکمل ہونے اور کامیاب بولی دہندہ کے اعلان کے بعد خریدار متعلقہ اسٹیٹ ویئر ہاو¿س جا کر اپنے نیلام شدہ لاٹ کا تفصیلی معائنہ اور مکمل تسلی کرے گا۔ صرف اس صورت میں جب خریدار مال کی حالت اور دستیابی سے مطمئن ہوگا، وہ مقررہ قواعد کے مطابق نیلامی کی رقم جمع کرا سکے گا۔ اس کے بعد متعلقہ حکام کی جانب سے ڈلیوری آرڈر جاری کیا جائے گا۔ سرکلر میں واضح کیا گیا ہے کہ ایک مرتبہ خریدار مال کی تصدیق کر کے ادائیگی کر دے اور ڈیلیوری آرڈر جاری ہو جائے تو بعد ازاں مال کی حالت، مقدار، دستیابی، شناخت یا کسی بھی دوسرے معاملے پر اعتراض یا دعویٰ قابل قبول نہیں ہوگا، کیونکہ ادائیگی سے قبل معائنہ کرنے کی مکمل سہولت فراہم کی جا رہی ہے۔ کسٹمز انفورسمنٹ کراچی نے تمام متعلقہ افسران، اینٹی اسمگلنگ آرگنائزیشن کے عملے، نیلامی برانچ، اسٹیٹ ویئر ہاو¿سز کے انچارجز اور دیگر متعلقہ حکام کو ہدایت جاری کی ہے کہ وہ اس نئے طریقہ کار پر سختی سے عمل درآمد یقینی بنائیں۔ اس کے علاوہ ہر نیلامی کے آغاز سے قبل تمام بولی دہندگان کو بھی ان ہدایات سے آگاہ کیا جائے گا تاکہ بعد ازاں کسی قسم کی غلط فہمی یا تنازع پیدا نہ ہو۔ کسٹمز حکام کے مطابق اس اقدام سے نیلامی کے پورے عمل میں شفافیت بڑھے گی، خریداروں کا اعتماد مضبوط ہوگا، غیر ضروری شکایات اور قانونی تنازعات میں نمایاں کمی آئے گی اور ضبط شدہ سامان کی نیلامی کا نظام مزید مو¿ثر اور منظم انداز میں چلایا جا سکے گا۔ سرکلر کی نقول کلکٹر کسٹمز انفورسمنٹ کراچی، ایڈیشنل کلکٹر، اسسٹنٹ کلکٹر (نیلامی)، آفیشل آکشنیر، اے ایس او حکام اور دیگر متعلقہ دفاتر کو بھی ارسال کر دی گئی ہیں تاکہ نئی ہدایات پر فوری عمل درآمد یقینی بنایا جا سکے۔