Breaking NewsEham KhabarExclusive Reports
اقوامِ متحدہ کے امدادی سامان کی افغانستان ترسیل کے لئےحکومتِ پاکستان کا طورخم بارڈر کے ذریعے راہداری کی اجازت دینےکا فیصلہ
- کراچی (کسٹم بلیٹن) حکومت پاکستان نے افغانستان میں انسانی ہمدردی کی بنیادوں پر جاری امدادی سرگرمیوں میں بڑی معاونت فراہم کرتے ہوئے اقوام متحدہ کے امدادی سامان میں شامل خوراک اورادویات کو پاکستان کے راستے افغانستان منتقل کرنے کی باضابطہ اجازت دے دی ہے۔ وزارت خارجہ پاکستان کی جانب سے جاری کردہ ایک انتہائی اہم اور فوری سرکاری دستاویز کے مطابق، وفاقی حکومت نے اقوام متحدہ کے امدادی سامان کو طورخم زمینی سرحد کے ذریعے افغانستان بھیجنے کے لیے این اوسی جاری کر دی ہے۔ذرائع کے مطابق، پاکستان میں تعینات اقوام متحدہ کے ریزیڈنٹ کوآرڈینیٹر کی جانب سے رواں سال 25 مئی اور 7 جولائی 2026 کو پاکستان کے ڈپٹی وزیراعظم اور وزیرخارجہ کو باضابطہ خطوط ارسال کیے گئے تھے۔ ان خطوط میں اقوام متحدہ نے افغانستان کے بحران زدہ عوام کے لیے امدادی سامان کی بحفاظت اور بروقت ترسیل کے لیے حکومت پاکستان سے ٹرانزٹ اور راہداری کی سہولیات فراہم کرنے کی درخواست کی تھی، جس پر ہمدردانہ غور کرتے ہوئے یہ فیصلہ کیا گیا ہے۔وزارت خارجہ کے ڈائریکٹر جنرل کی جانب سے جاری کردہ نعیم اقبال چیمہ کے مکتوب میں واضح کیا گیا ہے کہ وزارت خارجہ کو اقوامِ متحدہ کے امدادی کارگو کی طورخم بارڈر کے ذریعے افغانستان منتقلی پر کوئی اعتراض نہیں ہے۔ یہ منظوری نائب وزیرِ اعظم و وزیرِ خارجہ کی خصوصی ہدایت اور حتمی منظوری کے بعد دی گئی ہے، جس کی کاپی سیکرٹری وزارت تجارت کو اگلے تنفیدی مراحل اور کسٹمز کلیئرنس کے لیے بھیج دی گئی ہے۔اس اہم فیصلے کی نقول وزارتِ خارجہ کے ایڈیشنل سیکرٹری وزارت تجارت کے جوائنٹ سیکرٹری اور وزارتِ خارجہ کے ڈائریکٹر جنرل (یواین) کو بھی ارسال کر دی گئی ہیں تاکہ تمام متعلقہ محکمے آپس میں ہم آہنگی قائم کر کے امدادی سامان کی سرحد پار منتقلی کو کسی بھی رکاوٹ کے بغیر تیزی سے یقینی بنا سکیں۔
