کسٹمز کلیئرنگ ایجنٹس کے لائسنس کے لیے درخواستیں طلب، آئی بی اے کے تحت تحریری امتحان اور انٹرویو کا انعقاد ہوگا
اسلام آباد(کسٹم بلیٹن)فیڈرل بورڈ آف ریونیو کسٹمز رولز 2001ءکے رول 91 کے تحت امتحان کے ذریعے کسٹمز کلیئرنگ ایجنٹس لائسنس کے اجراءکے لیے اہل پاکستانی شہریوں سے درخواستیں طلب کر لی ہیں۔ایف بی آر کے نوٹیفکیشن کے مطابق لائسنس کے لیے امیدواروں کے لیے لازمی ہے کہ وہ پاکستان کے شہری ہوں اور ان کی عمر کم از کم 21 سال ہو۔ ، امیدوار کا کسی تسلیم شدہ یونیورسٹی سے گریجویٹ ہونا، گڈز ڈیکلریشن(جی ڈی) پروسیسنگ کے لیے کمپیوٹر کی مکمل مہارت رکھنا، کسی عدالت سے سزا یافتہ نہ ہونا اور بینک کے ذریعے تصدیق شدہ مستحکم مالی ریکارڈ کا حامل ہونا ضروری ہے۔خواہشمند امیدوار مقررہ فارم۔اے، پر اپنی درخواستیں متعلقہ لائسنسنگ اتھارٹی (کلکٹر آف کسٹمز) کے دفاتر میں 02 نومبر 2026ءتک جمع کرا سکتے ہیں۔ تمام درخواست دہندگان کے لیے لازمی ہے کہ وہ درخواست کے ساتھ 10ہزار روپے کی ناقابل واپسی فیس کا پے آرڈر جمع کروائیں۔ درخواست فارم، سلیبس اور دیگر تفصیلات آئی بی اے کراچی کی آفیشل ویب سائٹ سے ڈاو¿ن لوڈ کی جا سکتی ہیں۔تمام اہل امیدواروں، بشمول نئے اور موجودہ پروویژنل (عارضی) لائسنس ہولڈرز، کا قابلیت کا امتحان انسٹی ٹیوٹ آف بزنس ایڈمنسٹریشن (آئی بی اے) کے ذریعے لیا جائے گا۔ یہ امتحان تحریری ٹیسٹ (100 نمبر) اور انٹرویو (50 نمبر) پر مشتمل ہوگا۔ تحریری امتحان کے دو حصے ہوں گے؛ پہلے حصے (20 نمبر) میں کمپیوٹر کی مہارت اور گڈز ڈیکلریشن (جی ڈی) فائل کرنے کے عملی علم کا جائزہ لیا جائے گا، جس میں کامیابی کے لیے کم از کم 50 فیصد (10 نمبر) حاصل کرنا لازمی ہوگا۔ جو امیدوار پارٹ 1 میں پاس ہوں گے، صرف انہی کا پارٹ 2 (80 نمبر) چیک کیا جائے گا۔ مجموعی طور پر تحریری امتحان میں 50 فیصد نمبر حاصل کرنے والے امیدواروں کو ہی انٹرویو کے لیے اہل قرار دیا جائے گا۔امتحانات کا انعقاد ملک کے پانچ بڑے شہروں اسلام آباد، لاہور، کراچی، پشاور اور کوئٹہ میں کیا جائے گا۔ متعلقہ لائسنسنگ حکام 16 نومبر 2026تک تمام درخواستوں کی چھان بین (اسکروٹنی) کا عمل مکمل کریں گے۔ موجودہ پروویژنل لائسنس ہولڈرز کے لیے اس امتحان میں بیٹھنا لازمی ہے، اور عدم موجودگی کی صورت میں ان کا عارضی لائسنس منسوخ کر دیا جائے گا۔ تمام مراحل میں کامیا بی حاصل کرنے والے امیدوار کسٹمز رولز 2001 کے رول 94 کی دیگر تمام شرائط پوری کرنے کے پابند ہوں گے۔
