ایس اے پی ٹی پر درآمدی کنسائمنٹس سے سامان کی چوری پر کسٹمز کا سخت ایکشن
کراچی (کسٹم بلیٹن)ساﺅتھ ایشیاءپاکستان ٹرمینل (ایس اے پی ٹی)پر درآمدی کنسائمنٹس سے سامان کی چوری اورنقصان پہنچانے کی مختلف شکایات پر کلکٹرایس اے پی ٹی نے سخت نوٹس لیتے ہوئے ساوتھ ایشیا ءپاکستان ٹرمینل (ایس اے پی ٹی) کو ہدایت جاری کی ہے کہ نقصان اور چوری سے متعلق تمام زیر التوا اور نئی شکایات موصول ہونے کے سات روز کے اندر نمٹائی جائیں، جبکہ تصدیق شدہ دعوﺅں کے ازالے کو بھی یقینی بنایا جائے۔یہ اہم فیصلہ کسٹمز حکام، ساوتھ ایشیا ٹرمینل کی انتظامیہ اور آل پاکستان کسٹمز ایجنٹس ایسوسی ایشن (اے پی سی اے اے) کے نمائندوں کے درمیان منعقدہ ایک اعلیٰ سطحی رابطہ اجلاس میں کیا گیا، جس میں درآمد کنندگان اور کلیئرنگ ایجنٹس کو درپیش مسائل کا تفصیلی جائزہ لیا گیا۔اجلاس کے دوران آل پاکستان کسٹمز ایجنٹس ایسوسی ایشن نے درآمد کنندگان اور کسٹمز کلیئرنگ ایجنٹس کی جانب سے موصول ہونے والی متعدد تحریری شکایات اور ان کے ثبوت پیش کیے۔ ایسوسی ایشن کے نمائندوں نے بتایا کہ اگرچہ گزشتہ کچھ عرصے کے دوران سامان کی چوری کے واقعات میں نمایاں کمی آئی ہے، تاہم کارگو کی ہینڈلنگ اور معائنے کے دوران سامان کو پہنچنے والے نقصان کے واقعات اب بھی سنگین مسئلہ بنے ہوئے ہیں۔ایسوسی ایشن نے اس بات پر بھی تشویش کا اظہار کیا کہ شکایات کے اندراج اور ان کے ازالے کے لیے کوئی باقاعدہ اور موثر نظام موجود نہیں، جس کے باعث متاثرہ درآمد کنندگان اور کلیئرنگ ایجنٹس کو اپنے دعوﺅں کے تصفیے کے لیے طویل انتظار کرنا پڑتا ہے۔ اس صورتحال سے نہ صرف تجارتی سرگرمیاں متاثر ہوتی ہیں بلکہ کاروباری برادری کو مالی نقصانات کا بھی سامنا کرنا پڑتا ہے۔اجلاس میں اسسٹنٹ کلکٹر ایگزامینشن نے بھی اس امر کی تصدیق کی کہ کلکٹریٹ آف کسٹمز کو اسی نوعیت کی متعدد شکایات موصول ہو رہی ہیں، جس سے ظاہر ہوتا ہے کہ مسئلہ انفرادی نوعیت کا نہیں بلکہ ایک منظم اور موثر شکایتی نظام کی فوری ضرورت موجود ہے۔تفصیلی مشاورت کے بعد اجلاس میں متعدد اہم اور لازمی ہدایات جاری کی گئیں۔ ساوتھ ایشیا ٹرمینل کو پابند کیا گیا ہے کہ وہ نقصان اور چوری سے متعلق شکایات کے اندراج کے لیے ایک مستقل اور مخصوص شکایتی مرکز قائم کرے تاکہ متاثرہ فریقین اپنی شکایات فوری طور پر درج کرا سکیں۔مزید برآں ٹرمینل انتظامیہ کو ہدایت دی گئی کہ نگرانی کے کیمروں کی ریکارڈنگ محفوظ اور ہر وقت دستیاب رکھی جائے تاکہ کسی بھی شکایت کی صورت میں تحقیقات کو موثر بنایا جا سکے۔ شکایات کی جانچ پڑتال کے دوران متعلقہ ویڈیو ریکارڈنگ کا جائزہ لیا جائے گا اور اگر دعویٰ درست ثابت ہو تو اس کا فوری ازالہ کیا جائے گا۔اجلاس میں یہ بھی فیصلہ کیا گیا کہ تمام شکایات موصول ہونے کے سات روز کے اندر انکوائری، شواہد کا جائزہ، نگرانی کے کیمروں کی ریکارڈنگ کی جانچ اور دعوﺅں کے تصفیے کا عمل مکمل کیا جائے گا۔ اس مقصد کے لیے ساوتھ ایشیاپاکستان ٹرمینل، کسٹمز حکام اور آل پاکستان کسٹمز ایجنٹس ایسوسی ایشن کے درمیان مسلسل رابطہ اور تعاون برقرار رکھا جائے گا۔ذرائع کے مطابق اجلاس میں واضح کیا گیا کہ شکایات کے ازالے کے حوالے سے پیش رفت کا باقاعدگی سے جائزہ لیا جائے گا اور اگر کسی مرحلے پر غفلت، تاخیر یا عدم تعاون سامنے آیا تو اسے سنجیدگی سے لیا جائے گا اور ذمہ داروں کے خلاف مناسب انتظامی کارروائی بھی عمل میں لائی جا سکتی ہے۔
