درآمدی اشیاءپراضافی کسٹمز ڈیوٹی یکم جولائی سے نافذہوگی

اسلام آباد:(کسٹم بلیٹن) وفاقی حکومت نے مالی سال2026-27 کے آغاز پر درآمدی اشیا پر اضافی کسٹمز ڈیوٹی کی نئی شرح کا نفاذکرتے ہوئے ایس آراو1063جاری کر دیا ہے، جس کے تحت یکم جولائی 2026 سے متعدد درآمدی اشیا پر اضافی کسٹمز ڈیوٹی عائد کی جائے گی جبکہ کئی اہم شعبوں، صنعتی مشینری، مخصوص درآمدی اسکیموں اور بعض گاڑیوں کو اس سے استثنا بھی دیا گیا ہے۔ اس نوٹیفکیشن کے اجراءکے ساتھ ہی گزشتہ سال کاایس آراو1151منسوخ کردیاگیاہے نوٹیفکیشن کے مطابق 20 فیصد کسٹمز ڈیوٹی والے ٹیرف سلیب میں شامل بیشتر درآمدی سامان پر 2 فیصد اضافی کسٹمز ڈیوٹی وصول کی جائے گی، تاہم بعض مخصوص اشیا ءاور پی سی ٹی کوڈز پر یہ شرح 4 فیصد مقرر کی گئی ہے۔ ان اشیاءمیں بعض پیٹرولیم مصنوعات، پلاسٹک اور پولیمر، کیمیکلز، کاغذ، مصنوعی فائبر، مشینری کے پرزہ جات، الیکٹریکل آلات، سوئچ گیئر، ٹرانسفارمرز، صنعتی آلات اور دیگر مخصوص درآمدی مصنوعات شامل ہیں۔نوٹیفکیشن کے مطابق 25 فیصد یا اس سے زائد کسٹمز ڈیوٹی والے تمام ٹیرف سلیبز اور مخصوص شرح ڈیوٹی والی اشیا پر 10 فیصد اضافی کسٹمز ڈیوٹی عائد کی گئی ہے۔ تاہم حکومت نے خوردنی تیل کی بعض اقسام، جن میں سویا بین آئل، پام آئل، سورج مکھی کا تیل اور ریپ سیڈ آئل کو اس اضافی ڈیوٹی سے مستثنیٰ قرار دیا ہے۔ اسی طرح ایک ہزار سی سی سے زائد انجن گنجائش رکھنے والی گاڑیوں، جیپوں، لائٹ کمرشل گاڑیوں اور ہیوی کمرشل گاڑیوں کی (سی کے ڈی )حالت میں درآمد پر بھی یہ اضافی ڈیوٹی لاگو نہیں ہوگی۔وفاقی حکومت نے متعدد اہم درآمدات کو اضافی کسٹمز ڈیوٹی سے مکمل استثنا بھی دیا ہے۔ ان میں چیپٹر 84 اور85کے تحت صنعتی پیداوار کے لیے درآمد کی جانے والی پلانٹ اور مشینری، چیپٹر99کے تحت درآمدات، کسٹمز ایکٹ کے ففتھ شیڈول کے تحت بیشتر رعایتی درآمدات، بیگیج رولز 2006 کے تحت آنے والا سامان، مختلف خصوصی رعایتی ایس آر اوز کے تحت درآمدات، ٹیمپریری امپورٹ اسکیم، آف شور آئل اینڈ گیس منصوبوں کے لیے ایکسپلوریشن اینڈ پروڈکشن کمپنیوں اور ان کے کنٹریکٹرز کی درآمدات، ایک ہزار سی سی تک کی سی کے ڈی گاڑیاں، 850 سی سی تک کی مکمل تیار شدہ (سی بی یو) گاڑیاں، جبکہ مخصوص الیکٹرک گاڑیوں اور الیکٹرک موٹر سائیکلوں کے مختلف پی سی ٹی کوڈز کے تحت درآمد ہونے والی مصنوعات بھی شامل ہیں۔