کسٹمز کا اہم فیصلہ، گھاس بندر پر لانچوں کے داخلے پر پابندی
کراچی(کسٹم بلیٹن) کسٹمز حکام نے درآمدی سامان کی کلیئرنس کے حوالے سے گھاس بندر پر لانچوں کے ذریعے آنے والی درآمدی کنسائمنٹس سے متعلق اہم فیصلہ کیاگیاہے۔نوٹس کے مطابق کراچی پورٹ ٹرسٹ (کے پی ٹی) سے مشاورت کے بعد یہ فیصلہ کیا گیا ہے کہ وہ تمام لانچیں اور بحری جہاز جو 30 جون 2026 یا اس سے قبل این ایم بی گھاس بندر پر لنگر انداز ہو چکے تھے، ان کے درآمدی سامان کی کسٹمز کلیئرنس جاری رکھی جائے گی۔ تاہم 30 جون 2026 کے بعد کسی بھی نئی لانچ کو این ایم بی گھاس بندر پر لنگر انداز ہونے کی اجازت نہیں دی جائے گی۔دستاویزات کے مطابق ایف بی آر کے 22 جولائی 2026 کے خط کی روشنی میں ایک خصوصی کمیٹی تشکیل دی گئی ہے جو این ایم بی گھاس بندر کی آئندہ آپریشنل حیثیت اور اس کی فعالیت کا جائزہ لے گی۔ کمیٹی کی سفارشات آنے تک این ایم بی گھاس بندر پر لانچوں کی برتھنگ مکمل طور پر معطل رہے گی اور اس دوران کوئی نئی لانچ وہاں لنگر انداز نہیں ہو سکے گی۔کسٹمز حکام کے مطابق صرف انہی لانچوں کے سامان کی کلیئرنس کی جائے گی جو مقررہ تاریخ یعنی 30 جون 2026 تک برتھ کر چکی تھیں، بشرطیکہ متعلقہ گڈز ڈیکلریشن یا وی آئی آر قانون کے مطابق جمع کرایا گیا ہو۔نوٹس میں تمام درآمد کنندگان، کسٹمز کلیئرنگ ایجنٹس، لانچ و بحری جہاز آپریٹرز اور دیگر متعلقہ اسٹیک ہولڈرز کو ہدایت کی گئی ہے کہ وہ 30 جون 2026 یا اس سے قبل دائر کیے گئے امپورٹ جنرل مینی فیسٹ (آئی جی ایم) سے متعلق اپنی گڈز ڈیکلریشنز اور دیگر ضروری کسٹمز کارروائیاں فوری طور پر مکمل کریں تاکہ سامان کی بروقت کلیئرنس قانونی تقاضوں کے مطابق ممکن بنائی جا سکے۔کسٹمز حکام نے مزید کہا ہے کہ اگر اس پبلک نوٹس پر عملدرآمد کے دوران کسی بھی قسم کی دشواری پیش آئے تو متعلقہ اضافی کلکٹر کسٹمز سے فوری رابطہ کیا جائے۔ نوٹس کے مطابق یہ تمام فیصلے مجاز اتھارٹی کی منظوری سے نافذ کیے گئے ہیں۔
