راحیل مونس بلامقابلہ آل پاکستان شپنگ ایسوسی ایشن کے چیئرمین منتخب
کراچی(کسٹم بلیٹن) آل پاکستان شپنگ ایسوسی ایشن (ایپسا) کے سالانہ جنرل اجلاس کے دوران کراچی گیٹ وے ٹرمینل لمیٹڈ (کے جی ٹی ایل) کے راحیل مونس کو سال 2026-28 کے لیے بلامقابلہ ایسوسی ایشن کا چیئرمین منتخب کر لیا گیا ہے جبکہ عابد عزیز سینئر وائس چیئرمین اور رمیز وائس چیئرمین منتخب ہوئے ہیں۔تفصیلات کے مطابق نومنتخب چیئرمین راحیل مونس نے اپنے خطاب میں اس بات پر زور دیا کہ پاکستان جنوبی ایشیا اور وسطی ایشیا کے درمیان تجارت کے لیے ایک اہم راہداری کی حیثیت رکھتا ہے اور بالخصوص خشکی سے گھیرے ہوئے وسطی ایشیائی ممالک کے لیے ایک مرکزی تجارتی گزرگاہ ہے۔ انہوں نے کہا کہ شپنگ اور پورٹس کے شعبے کی جدید کاری، انفراسٹرکچر کی بہتری، بندرگاہوں کی کارکردگی میں اضافہ اور ضوابط کے عمل کو آسان بنانا وقت کی اہم ضرورت ہے۔ انہوں نے بتایا کہ ایپسا کے اراکین ملک کی 70 فیصد سے زائد سمندری تجارت کو ہینڈل کرتے ہیں اور ان کی جانب سے شپنگ، ٹرمینلز اور آف ڈاک ٹرمینلز کے شعبوں میں کی جانے والی وسیع سرمایہ کاری ملکی معاشی استحکام اور تجارتی ترقی میں کلیدی کردار ادا کر رہی ہے۔ ان کا کہنا تھا کہ ایپسا پاکستان کو خطے میں ایک اہم ٹرانزٹ اور ٹرانسشپمنٹ حب بنانے کے عزم کے ساتھ سمندری، زمینی اور ریلوے کے رابطوں کو مزید بہتر بنانے کے لیے کوشاں ہے۔
