پاکستان کی علاقائی تجارت میں بڑی پیش رفت، سوست کے راستے کرغزستان کو پہلی برآمد، گوادر بندرگاہ بھی فعال
کراچی (کسٹم بلیٹن )پاکستان نے علاقائی تجارت کے فروغ کی جانب اہم قدم اٹھاتے ہوئے پہلی مرتبہ کرغزستان کو زمینی راستے سے برآمدی کنسائمنٹ روانہ کر دی، یہ کنسائمنٹ سوست ڈرائی پورت کے ذریعے چین کے راستے وسطی ایشیا بھیجی گئی، برآمدکیاجانے والے کنسائمنٹس ایکسپورٹ پروسیسنگ زون سے روانہ کیا گیا برآمدکئے جانے والے کنسائمنٹ میں جڑی بوٹیوں کے تیل، چائے، مہندی اور سنگھار کی اشیاءزشامل ہیں، جبکہ کنسائمنٹ کا وزن تقریباً 24 ٹن اور مالیت لاکھوں روپے بتائی گئی ہے، اس ترسیل کو بین الاقوامی زمینی نقل و حمل کے نظام کے تحت مکمل کیا گیا جس سے سرحدی کارروائیاں آسان اور تیز ہو گئیں۔تفصیلات کے مطابق نئے راستے کے فعال ہونے سے پاکستان کو وسطی ایشیائی ممالک تک براہ راست رسائی حاصل ہو گئی ہے جبکہ افغانستان کے روایتی راستے پر انحصار کم ہوگا، حکام کے مطابق اس اقدام سے برآمدات میں اضافہ، وقت کی بچت اور اخراجات میں کمی ممکن ہوگی، ماہرین اسے پاکستان کی علاقائی رابطہ کاری کی حکمت عملی میں ایک اہم سنگ میل قرار دے رہے ہیں۔دوسری جانب گوادرپورٹ کی سرگرمیاں بھی تیز ہو رہی ہیں جو عالمی بحری راستوں کے قریب واقع ہونے کی وجہ سے غیر معمولی اہمیت رکھتی ہے، گوادر بندرگاہ کو اقتصادی راہداری منصوبے کے تحت ایک بڑے تجارتی مرکز کے طور پر ترقی دی جا رہا ہے جس سے جنوبی ایشیا، وسطی ایشیا اور مشرق وسطیٰ کے درمیان تجارت کو نئی راہیں ملیں گی۔حکام کا کہنا ہے کہ سوست کے ذریعے وسطی ایشیا سے درآمدات کا آغاز بھی ہو چکا ہے جس سے دوطرفہ تجارتی سرگرمیوں کو فروغ ملے گا، ماہرین کے مطابق یہ پیش رفت پاکستان کو علاقائی تجارت میں ایک مضبوط مقام دلانے اور ملک کو اہم تجارتی راہداری بنانے کی جانب ایک بڑا قدم ثابت ہوگی۔
